VIQUEQUE, 15 maiu 2023 (TATOLI)—Autoridade Protesaun Sivíl (APC, sigla portugés) Viqueque rejista uma hamutuk 19 hetan estragu kauza hosi dezastre naturál.
“Iha fulan-maiu ne’e, akontese anin no udan-boot estraga komunidade nia uma, nune’e ami konsege rejista ona uma hamutuk 19, kompostu hosi uma 13 hetan estragu totál no uma neen a’at naton, bee maka tama ba uma-laran. Ami mós fó apoia pakote emerjénsia ba vítima sira ne’ebé afetadu ba dezastre,” Komandante Operasaun APC Viqueque, Inspetór Polísia, Matias da Silva, relata iha sentru evakuasaun, Beloi, segunda ne’e.
Notísia relevante : APC rejista uma 18 hetan estragu iha semana ida nia-laran
Uma 13 ne’ebé hetan estragu totál simu ona pakote emerjénsia hanesan materiál rekuperasaun uma inklui nesedade bázika.
“Daudaun ne’e APC sei prosesu ba nasionál. Iha uma haat mak ami labele halo verifikasaun tanba uma ida hanesan loja, ne’e ita labele fó apoiu ruma, enkuantu uma ida ami fó apoia emerjénsia ne’e tanba bee maka tama. Iha uma rua mak tinan kotuk hetan ona materiál rekuperasaun nune’e ami labele verifika, karik sira muda hosi fatin risku ne’e bá fali fatin seluk maka ami halo verifikasaun,” nia akresenta.
Uma 19 ne’ebé hetan estragu iha postu Uatolari iha uma hitu, Viqueque Villa iha uma ualu no Ossu iha uma haat.
“Ami simu informasaun iha postu Uatucarbau akontese bee tama komunidade nia uma, nune’e aban maka ami bá halo verifikasaun no postu Lacluta iha uma rua maka hetan estragu, maibé iha liu postu Lacluta ami seidauk halo verifikasaun tanba kondisaun dalan. Tempu badak bainhira udan para ami sei bá halo verikasaun,” nia tenik.
Jornalista : Vitorino Lopes da Costa
Editora : Julia Chatarina
