DILI, 25 maiu 2023 (TATOLI)–Vise Prezidente Komisaun Nasionál Eleisaun (CNE), Domingos Berreto, hateten CNE simu keixa tolu durante hala’o apuramentu nasionál dahuluk nian.
Notísia Relevante: CNE valida votu reklamadu 66 hodi atribui votu 38 ba CNRT
“Durante loron dahuluk nian realiza apuramentu nasionál CNE simu mós keixa no reklamasaun hamutuk rua ne’ebé nia indisius ba iha elisitu eleitorál (pelangaran pemilu) nian,” nia dehan iha konferénsia imprensa, Colmera, Dili.
Nia hateten, keixa hirak-ne’ebé CNE simu dahuluk hosi Elia da Costa Babo, hamutuk ho reprezentante Partidu Conselho Nacional Recontrução Timor-Leste (CNRT) no Partidu os Verdes Timorense (PVT) kona-ba partisipasaun menoridade iha votasaun ne’ebé konfirma katak mosu prátika ne’ebé iha kategória krime eleitorál.
Keixa seluk, nia dehan, menoridade refere atinje idade nu’udar eleitór, tanba nia data moris iha fulan-agostu no novembru tinan 2006, nune’e prosesu hotu sei enkamiña ba Ministériu Públiku atu bele halo avariguasaun ba eleitór menoridade ne’e no ofisiál eleitorál responsavél iha sentru votasaun aldeia Sordoliu, suku Lourba, munisípiu Bobobnaro.
CNE mós simu reklamasaun hosi sidadaun ho naran Duarte Maia hamutuk ho reprezentante partidu polítiku CNRT no PVT nian iha senrtu votasaun Eskola Públiku Mazop, suku Ai-Assa, Bobonaro, kona-ba Fiskál na’in-rua (2) ne’ebé uza de’it kartaun kredensiál ida hodi asesu ba sentru votasaun.
“Iha mós kazu ida-ne’ebé iha hotu akompaña katak iha eleitór ida-ne’ebé vota dala rua, daudaun ne’e prosesu ba kazu refere iha ona Ministeriu Públiku nia liman,” nia dehan.
lha lorokraik, CNE sei simu mós akta hosi sentru votasaun sira hosi Reinu Unidu, Irlanda do Norte no Portugál.
Jornalista : Osória Marques
Editór : Cancio Ximenes
