DILI, 20 juñu 2023 (TATOLI)–Portu Tibar simu kontentór hamutuk 27.087 durante fulan-lima, hahú janeiru to’o maiu 2023), enkuantu kada fulan simu kontentór 6.000 resin.
“Kontentór sira ne’e maioria mai hosi Portu Surabaya, portu seluk mak Darwin no Singapura. Portu sira ne’e mak sai odamatan ida, maibé dala-ruma sasán sira ne’e mai hosi Xina, Austrália no fatin seluk maibé liuhosi portu tolu ne’e maka tama mai Timor. Ami labele publika reseita tanba sensitivu oitoan,” Diretór Ezekutivu Timor Port, Rafael Ribeiro, informa ba Agência Tatoli, iha ninia knaar fatin, Portu Tibar, tersa ne’e.
Notísia relevante : Portu Tibar rekolla ona reseita $648.000 to’o abríl 2023
Nia dehan, sasán sira ne’ebé mak tama maioria nesesidade bázika no sasán konstrusaun.
“Durante ne’e atividade Timor Port la’o hanesan baibain, maibé iha sorin seluk fó impaktu ba importadór sira tanba ho taxa ne’ebé aplika dala ruma sira selu la bibna, kontentór balun sira halo tránzitu ba nasaun seluk no balun entrega ba Governu,” nia akresenta.
Bainhira situasaun ne’e akontese maka impaktu ne’e entre Governu no empreza importadór.
“Saida mak impaktu ba Timor Port tanba konsumidór ladun iha no importadór ladun haruka sasán mai, entaun volume kontentór tama mai menus no benefísiu ba portu mós menus tanba ema ladun selu, kuandu tama barak liu bele fó benefísiu barak liu ba portu no nasaun,” Diretór relata.
Kona-ba retornu ba Portu Tibar daudaun ne’e volume seidauk sa’e signifikante, ne’ebé kestaun ne’e hanesan servisu todan ida ba jestór Portu Tibar, maibé otimista katak sei hetan filafali retornu maski tempu seidauk determina maibé molok kontratu tinan 30 ne’e ramata investimentu ne’e bele hetan filafali retornu.
“Esforsu ne’ebé ami halo mak komunika ho marketing ba ró na’in sira hotu iha mundu tomak katak iha Timor daudaun iha fasilidade portu ne’ebé maka internasionál, fasilidade modernu hodi fasilita sira bainhira sasán sira hakarak halo tránzitu iha Timor,” nia haktuir.
Ho ida-ne’e , Rafael Ribeiro salienta, iha mudansa oitoan tanba uluk bainhira iha Portu Dili ró ne’ebé tama ne’e másimu dala-ida kontentór 700 tanba kondisaun portu no autoriza de’it ró kiik, maibé agora ró boot komesa tama.
Jornalista : Antónia Gusmão
Editora : Julia Chatarina
