DILI, 22 juñu 2023 (TATOLI)–Prezidente Autoridade Munisípiu Dili (AMD), Guilhermina Filomena Saldanha Ribeiro, hateten AMD sei haruka tékniku jardinazen no tékniku jestaun semitériu na’in-haat (4) ba Portugál hodi tuir formasaun.
Nia hateten, objetivu hosi formasaun ne’e atu aumenta no hasa’e kapasidade tékniku sira-nian no oinsá mak bele halo jardin ida matak no fresku iha sidade ida, tanba durante ne’e ekipa AMD nian ladún hatene atu halo Jardin hanesan ne’ebé, nune’e presiza aumenta sira-nia koñesimentu oinsá atu servisu hodi kuidadu no halo Jardin matak.
“Tékniku jardinazen na’in-rua ho tékniku jestaun semitériu na’in-rua hamutuk na’in-haat ne’ebé daudaun ne’e tuir hela formasaun kona-ba lian portugés nian iha Timor. Iha fulan-setemberu ne’e sira-na’in haat sei aranka no sira mak sei sai formadór ba área jardinazen no semitériu nian,” nia hateten ba Agência Tatoli, iha serimónia entrega asesora Dezenvolvimentu Munisípiu Dili hosi programa PARTISIPA, iha salaun AMD, Matadouro, kuarta ne’e.
Maibé, nia dehan, ekipa hosi Portugál mós sei mai ajuda no observa atividade iha Jardin iha Timor-Leste, tanba Timor-Leste ne’e iha iklima rua de’it no Portugál iha iklima haat entaun sira hatene ona atu tau ahi-oan ida-nebé iha sidade Dili.
AMD hahú halo manutensaun ba Jardin lima iha Dili
Prezidente Autoridade Munisípiu Dili, Guilhermina Filomena Saldanha, hateten Jardin lima (5) hanesan Jardin 12 de Novembro, cinco de maio, Jardin lecidere, Jardin Colmera ida iha sede Partidu Demokrátiku, no Jardin GMN oin ne’e, hahú halo manutensaun ona.
“Prosesu manutensaun la’o ona besik fulan-ida ona. No tanba durante ne’e, ita AMD kontrola mak Jardin lima ne’e de’it,” nia dehan.
Hosi manutensaun ne’e, nia dehan, ninia orsamentu la hanesan tanba iha jardin balun iha $75.000-resin no iha seluk fali $80.000-resin, maibé ida ho orsamentu boot mak Jardin de Lecidere nian.
Jornalista : Osória Marques
Editór : Cancio Ximenes
