MALIANA, 13 jullu 2023 (TATOLI) – Prezidente Repúblika (PR), José Ramos Horta, kuarta ne’e apoia fundu ba Klínika Madre Cesilia dos Santos iha suku Tapo-Memo, postu administrativu Maliana, munisípiu Bobonaro.
Xefe estadu dehan, fundu ne’ebé apoia mai hosi komunidade emprezáriu timoroan no xines sira atu nune’e klínika refere bele iha espasu ne’ebé natoon hodi fó tratamentu di’ak liután ba komunidade sira.
Horta subliña, madre sira halo atividade tinan barak ona iha klínika ne’e, iha ema barak, komunidade internasionál, governu no Primeiru Ministru, Ka Rrala Xanana Gusmão rasik mós fó apoia tanba haree rezultadu serbisu di’ak tebes.
Tuir antes ne’e Prezidente Repúblika mós apoia ona klínika ne’e iha programa nutrisaun nian.
Jestora Klínika Madre Cecilia dos Santos, Irmá Cristina Paula Duarte, sente konte no agradese ba xefe estadu ho nia ekipa no emprezáriu xines no timoroan sira.
“Apoia ne’e atu halo konstrusaun ba sentru sosiál foun, iha-ne’e ne’ebé espera sei finaliza iha tinan ne’e, atu kontinua serbisu iha Tapo-Memo atubele akompaña família sira-ne’ebé kiak, depois konsulta iha klínika no apoia mós ba atividade labarik nia iha eskola,” nia dehan.
Jornalista : Sérgio da Cruz
Editór : Evaristo Soares Martins
