DILI, 08 agostu 2023 (TATOLI)—Komisáriu Ezekutivu Servisu Tékniku Eletricidade de Timor-Leste, Empreza Públika (EDTL,E.P), Latino Jerónimo, konvoka reuniaun ho entidade relevante, tersa ne’e, hodi atualiza informasaun no diskute arrendamentu aluga poste eletrisidade ne’ebé dada kabu fibra óptika.
Entidade ne’ebé partisipa reuniaun ne’e mak hanesan reprezentante hosi Ministériu Obra Públika (MOP), Autoridade Nasionál Komunikasaun (ANC, sigla portugés), Autoridade Munisipál, TIC Timor inklui Operadór Telekomunikasaun hanesan Timor Telecom, Telkomcel no Telemor.
Notísia relevante : EDTL, E.P sei instala pre-pagu foun iha tempu badak
“Iha reuniaun ne’e, EDTL, E.P fó prazu semana rua ba operadór telekomunikasaun ida-idak atu halo identifikasaun no melloramentu ba instalasaun kabu fibra óptika iha poste eletrisidade ne’ebé desorganizadu iha sidade Dili inklui kapitál munisípiu sira tuir padraun ne’ebé estipula ona iha kontratu,” refere nota ne’ebé Agência Tatoli, tersa ne’e.
Bainhira operadór telekomunikasaun la kumpre kondisaun no prazu ne’ebé determina ona, maka EDTL, E.P sei aplika sansaun hodi tesi-kotu kabu hirak ne’ebé konsidera desorganizadu no ikus mai sei hapara kontratu aluga poste eletrisidade.
Asaun hirak ne’e EDTL, E.P foti relasiona ho orientasaun Sekretáriu Estadu Eletrisidade, Água no Saneamentu, Santos Noronha, no preokupasaun públiku durante ne’e kona-ba kabu hirak ne’ebé dada iha poste eletrisidade ho kondisaun tabele no monu iha trotoar leten.
Jornalista : Arminda Fonseca
Editora : Julia Chatarina
