DILI, 18 agostu 2023 (TATOLI)—Prezidente Parlamentu Nasionál (PN), Maria Fernanda Lay, husu FALINTIL Forsa Defeza Timor-Leste (F-FDTL) atu ka’er metin nafatin esperítu funu na’in sira-nian iha ámbitu komemorasaun aniversáriu loron FALINTIL ba dala-48 (20 agostu 1975-20 agostu 2023) iha 20 agostu tinan ne’e.
Notísia Relevante: Odelgomo nu’udar konsentrasaun FALINTIL Rejiaun IV durante períodu rezisténsia
“Ha’u fiar katak, F-FDTL kontinuidade ita-nia funu na’in sira ninian, intensaun luta ba libertasaun nasaun tenke ka’er nafatin hodi lutu metin nafatin ba ita-nia rai ba saida de’it. Ha’u espera. ho aniversáriu ida ne’e sira nia serbisu hala’o di’ak liután,” Prezidente PN ne’e hateten ba jornalista sira iha uma fukum PN, sesta ne’e.
Vise bankada Fretilin, Deputadu David Dias Ximenes ‘Mandati’, hato’o kongratulasaun ba sira ne’ebé hamosu 20 agostu nu’udar kontra ofensiva ba asaun sira-ne’ebé maluk sira seluk halo iha momentu ne’eba. hahú hosi 11 agostu to’o 19 agostu kalan hodi dehan ba mundu katak sira sei iha.
“Ita tenke kongratula sira, hanesan sira-ne’ebé komanda iha momentu ne’eba, primeiru mak Rogeiro Tiago Lobato, segundu Hermenegildo Alves, tuir mai Fernando Bukar Carmo, José António Galuso, Sebastião Sarmento, João Silvestre Branco ho sira seluk tan, ne’ebé sira halo levantamentu kontra ofensiva momentu ne’eba, golpe ne’ebé hala’o hosi ida maluk sira hosi UDT,” nia dehan.
Nune’e, merese ema hotu hakruk ho minutu ida silénsiu ba sira-ne’ebé sei moris ifó kongratulasaun no sira ne’ebé mate ona fó sentidu kondolénsia, Maromak bele simu sira, no sira nia asaun sira-ne’ebé halo hodi ohin loron Timor-Leste bele hetan ukun rasik aan.
“Sira eróiu duni, ita labele nega. Sira duni halo forsa armada iha Dili bele book aan defende katak, povu maubere direitu atu hetan Liberdade ka ukun rasik aan,” nia hateten.
Notísia Relevante: F-FDTL realiza marcha durante loron-tolu komemora loron FALINTIL ba dala-48
Jornalista : Nelson de Sousa
Editór : Cancio Ximenes
