iklan

BOBONARO, HEADLINE, MUNISÍPIU, POLÍTIKA

Odelgomo nu’udar konsentrasaun FALINTIL Rejiaun IV durante períodu rezisténsia

Odelgomo nu’udar konsentrasaun FALINTIL Rejiaun IV durante períodu rezisténsia

Veteranu Rejiaun IV atuál Sekretáriu Konsellu Veteranu Munisípu Bobonaro, Lúcio Dinis Marques 'Onsar'. Imajen Tatoli/Sérgio da Cruz.

BOBONARO, 17 agostu 2023 (TATOLI) – Veteranu sira hosi munisípiu Bobonaro apresia ho Governu ne’ebé deside Odelgomo nu’udar fatin ba komemorasaun Forsa Armada Libertasaun Nasionál Timor-Leste (FALINTIL) 20 agostu ba dala-48 tanba fatin ne’e nu’udar konsentrasaun ba FALINTIL sira iha prosesu luta ba libertasaun nasionál.

Falta de’it loron tolu, Povu Timor-Leste selebra loron FALINTIL iha aldeia Odelgomo, suku Ai-Asa, postu adminsitrativu Bobonaro, munisípiu Bobonaro tanba fatin ne’e nu’udar konsetrasaun FALINTIL liuhossi Komandu Rejiaun IV Fronteira Súl iha períodu rezisténsia.

Veteranu Rejiaun IV, Lúcio Dinis Marques ‘Onsar’, konsidera desizaun Komandu F-FDTL ne’ebé hili fatin ne’e hodi komemora loron istóriku refere, importante tebes tanba tinan 20 ba kotuk FALINTIL rejiaun IV Fronteira Súl no Norte konsentra hamutuk iha fatin ne’e hodi reziste kontra forsa Indonézia to’o hetan Timor-Leste nia auto-determinasaun.

Notísia relevante: Preparasaun serimónia loron FALINTIL iha Odelgomo atinje 25%

“Ita hatene tuir katak iha fatin ne’e mak konsentra ita-nia forsa hodi hahú prepara atubele duni sai forsa Indonézia, nune’e ita-nia oan sira, bei-oan, joven sira atu hatene tuir istória ida-ne’e, katak iha parte fronteira mós terus, susar, lubuk ida mak fó-aan ba mate, tanbá rai ida-ne’e, fakar sira-nia raan, lekar sira-nia ruin, hosi lorosa’e, loromonu, tasi feto no tasi mane. Ida-ne’e mak ita hatudu ba joven sira,” veteranu ne’e ko’alia iha Odelgomo.

Nune’e mós Veteranu Odelgomo, Basco Alves ‘Rai-Husar’, sente kontente no agradese tanba liuhosi komemorasaun ne’e bele valoriza rezisténsia komandu rejiaun IV nia luta no haklaken memória no istória pasadu ba jerasaun foun sira.

Nia dehan, jerasaun foun dalaruma seidauk hatene istória, tanbu komando rejiaun IV ne’e la’ós de’it ba aldeia Odelgomo maibé parte hosi Fornteira Sul nian durante príodu rezisténsia.

Autoridade Bobonaro kontribui $2.800

Autoridade Munisípiu Bobonaro (AMB) aloka orsamentu $2.800 hodi komemora loron Forsa Armada Libertasaun Nasionál Timor-Leste (FALINTIL) 20 agostu ba dala-48 ne’ebé realiza iha aldeia Odelgomo, suku Ai-asa, postu administrativu Bobonaro, munisípiu Bobonaro.

Prezidente Autóridade Munisípiu Bobonaro, Ernesto de Oliveira Barreto, fó-sai katak, eventu ne’e oragniza hosi Komandu FALINTIL-Forsa Defeza Timor-Leste nune’e autoridade fó apoia de’it tanbá hola parte mós iha sub-komisaun organizadora.

Parte autoridade munisípiu mos halo enkontru ho konsellu veteranu munisípiu Bobonaro, deside veteranu iha suku 18 ne’ebé pertense ba postu administrativu Bobonaro kada ema kontribui $25 no ba funsionáriu sira la determina valór osan.

“Orsamentu hosi autoridade munisípiu rasik ne’e $2,800 ne’e fó apoia ba atu sosa karau tolu, ba iha dia 19 lokraik, ami-nia preparasaun ne’e mínimu karau neen, másimu karau ualu mak ami prepara, signifika lokraik ne’e ami tenke oho ona karau lima ka neen ba komunidade sira, liuliu suku 50 no munisípiu haat ne’ebé sei tama mai, nune’e distribui foos ho na’an ba sira, iha loron 19 kalan no 20 agostu,” nia informa ba Tatoli, iha Maliana, kinta ne’e.

“Ita agradese tanba komemorasaun tinan ne’e realiza iha ita-nia munisípiu, ida-ne’e onra boot ida ba ita Bobonaro hotu, bele iha ona istória ruma ba iha jerasaun oan no bei-oan sira ba tinan 50, 60 no1 00 mai,” nia akresenta.

Iha ámbitu serimónia ne’e sei iha serimónia lansamentu ba Momumentu Komandu Fronteira Súl ne’ebé kompleta ho kruz no plaka ne’ebé sei asina hosi Prezidente Repúblika, José Manuel Ramos Horta.

Entretantu atu komemora loron istoriku ne’e komisaun organizadora mós realiza ho atividade sira hanesan jogu futeból, voleiból no kurrida maratona kilómetru 6, rute hosi Gumer mai postu Bobonaro vila ne’ebé sei realiza iha loron 19 fulan-agostu.

Serimónia solene ne’e sei prezide direita hosi Prezidente Repúblika, José Manuel Ramos Horta, no bainaka espesiál sira-ne’ebé konfirmadu atu partisipa mak hanesan Prezidente Repúblika, José Manuel Ramos Horta, Ministru Administrasaun Estatál, Tomas do Rosário Cabrál, Ministra Edukasaun, Dulce de Jesus Soares no Vise Xefe Estadu Maiór F-FDTL, Jenerál Calisto dos Santos ‘Coliaty’ no bainka sira hosi munisípiu Covalima, Ainaro, Ermera no Liquiçá ne’ebé pertense ba rejiaun IV nian.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!