BOBONARO, 20 agostu 2023 (TATOLI) – Vise-xefe Estadu Falintil Forsa Defeza Timor-Leste (F-FDTL), Jenerál Calistro dos Santos ‘Coliati’, apela ba membru F-FDTL sira atu hametin prinsípiu no valór Forsa Armada Libertasau Nasionál (FALINTIL) hodi repeita no valoriza aas-uain sira-nia luta nune’e bele kontribui ba konstrusaun Estadu no nasaun.
Coliati haktuir, iha situasaun difisil nia laran no hetan presaun oioin, Komandante Falintil sira hanesan, Nicolau Lobato, Xanana Gusmão, Ramos Horta, Taur Matan Ruak no sira seluktan, kontinua nia luta ba libertasaun ba pátria ho Lema katak Povu mak Bee, Falintil mak ikan to’o ikus konkista duna Independénsia hosi Kolonializmu no okupasaun sira.
Maibé iha faze konstrusaun Estadu no nasaun, F-FDTL nu’udar kotinuasaun hosi papél ne’ebé asuwain FALINTIL sira hosik hela hodi servi povu no nasaun.
“Ha’u lori komandu Falintil-FDTL nia naran, aproveita oportunidade, apela ba jerasaun foin-sae ne’ebé integra iha fileira iha Forsa armada, atu kaer-metin prinsípiu no valór Falintil. Só nune’e mak ita bele respeita, valoriza no hadomi naran ida Falintil ne’ebé tutan ho FDTL,” Vise Xefe Estadu F-FDTL, Coliati, hato’o iha ámbitu komemorasaun loron 20 agustu, FALINTIL ba dala-48, iha aldeia Odelgomo, Suku Ai-asa, Postu administrativu Bobonaro, munisípiu Bobonaro.
“Papél forsa armada iha povu nia leet, la’ós atu povu servi, maibé ita atu servi ita-nia povu liuhosi papél garante estabilidade, para konstrusaun pás bele alkansa ba objetivu finál, bem-estár povu, “nia katak.
Coliati dehan, ukun-aan ida ne’e liu hosi prosesu moruk teb-tebes, ema barak mak sakirifika nia vida, fakar ran, lekar ruin iha fatin-fatin hodi defende lia-loos ho objetivu ida katak Timor-Leste tenke hamriik hanesan pais soberanu no independente.
Tuir eis gerileiru ne’e, F-FDTL mós tenke hametin pás no estabilidade iha rai-laran liu-liu ezerse funsaun Lutu nasaun hodi asegura povu no nasaun hosi ameasa externa atu nune’e bele fó oportunidade ba governu implementa programa ne’ebé planeia ona hodi responde povu nia aspirasaun liuliu alkansa sira-nia objetivu ba moris di’ak.
“Ita-nia ukun-na’in sira, labele halo dezenvolvimentu enkuantu laiha estabilidade,” Vise-xefe Estádu F-FDTL hateten.
Nia dehan, komemorasaun ne’e ho objetivu ida-idak atu halo reflesaun, hodi refleta tinan 48 ezistensia Falintil liu-liu relembra istória pasada ne’ebé mukit, mai hosi susar no terus, matan-been no ran to’o alkansa nia objetivu.
Notísia relevante:PPN husu F-FDTL ka’er metin nafatin espirítu funu na’in
Labele sai protagonista ba Arte-marsiál
Iha loron istóriku no importante ne’e, Vise-xefe Estadu Falintil Forsa Defeza Timor-Leste (F-FDTL), Jenerál Calistro dos Santos ‘Coliati’, husu ba líder polítiku sira atu labele sai protagonista ba grupu arte marsiál sira ne’eb’e eziste iha territóriu nasionál.
Notísia Relevante:Deputadu KHUNTO husu KRAM fó sansaun ba membru organizasaun arte marsiál
Tuir nia, ohin loron to’o ona 48 anos ezisténsia Forsa Armadas no tinan 20 resin restaurasaun Independénsia maibé situasaun iha Timor-Leste sei rungu-ranga, tanbá joven sira tuda-malu, oho-malu liu-liu polítiku sira mós envolve no lidera ona arte marsiál.
Coliati hateten, Timor-leste hanesan país Estadu direitu demokrátiku, maibé iha nia limitasaun tanbá sei iha aparelu rua hanesan Forsa Armada no Polísia Nasionál Timor-Leste (PNTL) atu garante pás no estabilidade iha rai-laran.
Ema daruak iha Instituisaun Falintil Forsa Defeza Timor-leste (F-FDTL) ne’e haklaken, bainhira polítiku sira mos envolvea an iha arte marsiál hodi hamosu instabilidade signifika Forsa armada ho PNTL la serve ezisti iha nasaun ida ne’e.
“Ha’u husu ba matenek sira no polítiku sira sira labele atu sai protagonista ba arte marsiál tanba arte marsiais e um futuro da ameaça para o Estado de Direito da República Democrática Timor-Leste. Portantu, ida ne’e ba matenek-na’in sira ba ita-boot sira-nia analiza, iha kestaun estratejíka para depois ita-boot sira bele hetan konkluzaun. Ba ha’u nu’udar jenerál, ha’u-nia análize, ameasa ba futuru rai ida ne’e nia, la mai hosi tasi balun, ameasa iha ita-nia bolsu laran,” nia hateten
Vise-xefe Estadu Falintil Forsa Defeza Timor-Leste (F-FDTL), Jenerál Calistro dos Santos ‘Coliati’, dehan, povu presiza hakmatek tanbá Idependénsia Timor-Leste ida ne’e sosa ho ran no ruin liuhosi sakrifísiu naruk ema ua’in nian.
Notísia relevante:Komisaun G sei diskute proposta-lei prátika desportiva arte marsiál iha espesialidade
Jornalista: Sergio da Cruz
Editór: Rafael Ximenes de A. Belo
