DILI, 14 agostu 2023 (TATOLI)—Deputadu hosi bankada KHUNTO iha Parlamentu Nasionál, António Perreira, husu Komisaun Reguladora Arte Marsiál (KRAM) tenke fó sansaun ba organizasaun arte marsiál ne’ebé la kontrola nia membru hodi perturba orden públika.
Notísia Relevante: PNTL asegura na’in-lima ne’ebé provoka hafoin graduasaun PSHT iha Tibar
“Husu ba Komisaun Reguladora Arte Marsiál (KRAM) atu bele fó sansaun imediata, tanba organizasaun sira-ne’ebe mak la kria pás iha nasaun ida-ne’e. Akontese iha ohin dadeer, joven sira tuda malu iha Raikotu, bainhira joven sira hosi organizasaun PSHT ramata simu graduasaun hosi hosi Tibar, ne’ebé husu ba KRAM atu bele investiga komisaun organizadora ba gradusaun hosi PSHT atu bele hatene motivu hosi konfrontu ne’e,” Deputadu KGUNTO ne’e levanta liuhusi reuniaun plenária PN, segunda ne’e.
Hanesan reprezenta povu iha uma demokrásia ida-ne’e, nia parte lamenta tebes ho aktu ne’ebé mosu iha kapitál nasaun nian liuliu iha Dili laran, ne’ebé halo situasaun la hakmatek iha tempu kalan.
Lei mak aas hodi regula sidadaun no asosiasaun ho grupu atu nasaun ida-ne’e ho organizasaun sira-ne’ebé Estadu ka Governu fó legalidade ba organizasaun sira hotu, atu bele hala’o nia atividade no kada organizasaun iha nia orijen no doutrina.
Ho nune’e, Deputadu ne’e husu ba kada organizasaun arte marsiál kontrola nia membru sira no ema hotu haree ba unidade nasionál hodi konsentra ba dezenvolvimentu nasaun.
Deputadu CNRT, Ricardo Baptista, lamenta situasaun seguransa iha kapitál Dili kontinua akontese tuda malu, nune’e parte Governu presiza haree lori situasaun hakmatek ba povu no husu joven sira kontribui ba pás no estabilidade.
“Hakarak fó hanoin hela ba Governu liuliu seguransa iha rai-laran, ita bele dehan horikalan no ohin dadeer hamosu situasaun ne’ebé ladún di’ak ba fatin hirak kedas iha Dili laran, problema tuda malu,” nia dehan.
Vise Ministru ba Asuntu Parlamentár, Adérito Hugo da Costa, rejista kestaun oinsá KRAM halo implementasaun regra ba grupu arte marsiál sira, tanba komete iha aktu perturba orden públika atu haree.
“Lamentável tebes, ita kontinua haree. Jestu hotu-hotu Governu halo inklui Governu anteriór depois atu normaliza. Maibé, nafatin tendénsia grupu arte marsiál seidauk nafatin hakruuk ba regra atu labele perturba orden públika. Ita hotu asiste liuliu iha kapitál Dili tendénsia kontinua prátika perturba orden públika komete hosi membru grupu arte marsiál sira,” nia hateten
Jornalista : Nelson de Sousa
Editór : Cancio Ximenes
