DILI, 14 agostu 2023 (TATOLI) – Komandu Polísia Nasionál Timor-Leste (PNTL), liuhosi Eskuadra Dom Aleixo no ekipa unidade intelijénsia, asegura ema na’in-lima ne’ebé kria konfrontu hafoin graduasaun ba Organizasaun Arte Marsiál (GAM) Persauraan Setia Hati Terate (PSHT).
Konfrontu ne’e akontese iha segunda (14/8) tuku 4:00 madrugada, bainhira membru PSHT fila hosi serimónia graduasaun iha Tibar, Munisípiu Liquiça.
Bainhira membru PSHT sira ne’e fila hosi Tibar, to’o iha área Tasi-Tolu derepente hetan provokasaun no tuda hosi ema individu balun no mosu konfrontu ne’ebé alastra mai to’o iha área Rai-Kotu, Kampung Alor.
“PNTL desde horseik hetan orientasaun hosi Komandu Jerál hodi apoia seguransa ba atividade graduasaun PSHT nian ne’ebé hala’o iha Tibar. Baihira sira sai hosi Díli laran atu ba Tibar, bem organizadu, maibé depois atividade graduasaun ne’e remata ohin madrugada mak sira fila hosi Tibar mak iha dalan mosu provokasaun iha área Tasi-Tolu, Rai-Kotu, Ponte CPLP, Kampung Alor to’o mosu konfrontu iha fatin sira ne’e”, Komandante Eskudra Dom Aleixo Inspetór Polísia, Alexadrino da Costa ‘Alex Samurai’ hateten ba TATOLI iha kna’ar fatin Eskuardra Dom Aleixo Comoro, segunda ne’e.
Nia dehan, konfrontu ne’ebé mak mosu ne’e ladún bo’ot tanba PNTL halo intervensaun lalais.
“Ita asegura ona ema na’in-lima ba kazu konfrontu ne’e nai’n-haat hosi Rai-Kotu no na’in-ida seluk hosi Kampung Alor. Enkuantu suspeitu sira seluk mak halai ses hosi konfrontu ne’e PNTL sei buka tuir hela”, nia dehan.
Alex Samurai hateten, agora daudaun suspeitu sira ne’e submete ona ba prosesu investigasaun.
Nia informa, hosi konfrontu ne’e, PNTL rejista iha uma balun komunidade nian rahun tanba hetan tuda, karreta ida inklui karreta privadu ida ne’ebé membru PNTL uza hodi halo patrolla mós hetan estragu.
“Uma hira no sasan hira mak hetan estragu ami seidauk iha dadus lolos ba ida ne’e, tanba sei iha hela investigasaun maibé ami sei hato’o ba Komandu PNTL Díli”, nia adianta.
Iha biban ne’e, Komandante Eskuadra Dom Aleixo ne’e husu ba lider arte marsiál tantu rituál sira atu koopera nafatin hodi kontibui ba estrabilidade.
“Molok atividade graduasaun ne’e, ha’u bolu ona lider arte marsiál Ikatan Kera Sakti (IKS), Persaudaraan Setia Hati Terate (PSHT) no ha’u mós bolu lider grupu arte KORK no 77, husu atu kontinua kontrola sira-nia membru hodi koopera pás no estabilidade”, nia dehan.
“Kuandu sira la kumpre ida ne’e, ha’u kuandu kontatu sira-nia lider sira mós sei simu konsekuénsia, tanba ne’e husu sira atu asegura sira-nia membru atu bele kontribui ba pás no estabilidade”, nia konklui.
Jornalista: Natalino Costa
Editór : Zezito Silva
