DILI, 22 agostu 2023 (TATOLI) – Ministru Interiór (MI), Francisco Guterres, husu ba membru PNTL tenke halo servisu tuir lei no orden, labele envolve iha Grupu Arte Marsiál (GAM).
Nia dehan, kuandu membru PNTL sira mak detet envolve iha Grupu Arte Marsiál sei suspende nia hosi nia servisu.
“Ita husu ba membru PNTL sira tenke kumpre regra sira ne’e tanba ne’e mak Governu iha ona diskusaun katak kuandu membru PNTL ida mak envolve iha atividade Grupu Arte Marsiál, ami sei foti medida ba membru polísia sira katak sei suspende sira hosi sira-nia servisu”, Ministru Interiór Francisco Guterres hateten ba jornalista sira iha Parlamentu Nasionál, tersa, ohin.
Governante ne’e husu ba membru PNTL sira labele envolve aan iha atividade arte marsiál atu bele halo atuasaun ho neutru.
“Sira kuandu deteta mak envolve atividade arte marsiál sei suspende sira hosi sira-nia servisu, la’os atu hasai sira hosi polísia maibé suspende sira atu fó hanoin ba sira katak durante sira sei polísia labele envolve aan iha atividade arte marsiál”, nia dehan.
“Sé lae, polísia sira mak envolve iha atividade arte marsiál, kuandu sira tún ba halo atuasaun mak sei laiha ona neutralidade, tanba ida-idak defende nia organizasaun”, nia adianta.
Jornalista: Natalino Costa
Editór : Zezito Silva
