DILI, 23 agostu 2023 (TATOLI)—Parlamentu Nasionál (PN), kuarta ne’e, iha debate faze espesialidade ba proposta-lei Orsamentu Retifikativu (OR) 2023, aprova ona hodi hatun taxa importasaun hosi 5% ba 2,5%, hosi lei vijente Orsamentu Jerál Estadu (OJE) 2023.
Notísia Relevante: Governu hakarak revee lei impostu seletivu hodi normaliza presu sasán
“Rezultadu votasaun ba artigu 3 no seu todo a-favór 44, kontra tolu (3), abstensaun 16, nune’e pasa,” Prezidente Parlamentu Nasionál Interina no Atuál Primeira Vise Prezidente PN, Maria Terezinha Viegas, hateten iha sala plenária PN.
Alterasaun lei númeru 15/2022, 21 dezembru, Orsamentu Jerál Estadu (OJE) ba 2023, iha artigu 3 Impostu, taxa no kontribuisaun, iha númeru 5, durante tinan 2023, taxa impostu seletivu konsumu aplikável ne’ebé revoga tiha pontu “a” hosi lei vijente, nune’e mós revoga númeru 6 hosi artigu refere.
Notísia Relevante: Proposta PLP-KHUNTO hatun taxa tabaku pasa iha PN
IX Governu introdús programa hakarak hamenus impaktu inflasaun no aumentu kustu vida ba sidadaun sira, nune’e bele aumenta kapasidade kompra. Ba inisiativa ne’e, Governu halo ajustamentu ba taxa impostu seletivu konsumu no direitu aduaneiru ba importasaun ne’ebé bele aplika iha tinan 2023, ho baze Lei nú. 15/2022, 21 dezembru, kona-ba OJE 2023.
Tanba ne’e, halakon taxa impostu seletivu konsumu ba produtu masin-midar, aumentu ba direitu aduaneiru importasaun, inklui aplika fila-fali taxa anteriór ho 2,5%.
Notísia Relevante: PN aprova proposta Orsamentu Retifikativu biliaun $1,7 iha faze jeneralidade
Jornalista : Nelson de Sousa
Editór : Cancio Ximenes
