DILI, 01 setembru 2023 (TATOLI)—Prezidente Autoridade Munisípiu Dili (AMD), Guilhermina Filomena Saldanha Ribeiro, hateten bainhira transporte públiku no transporte privada inklui karreta Estadu Governu utiliza estasionamentu tenke selu sentavu 0,25.
“Iha balun sa’e karreta Governu maibé kuandu husu atu selu, sira dehan ami sae karreta Governu tanbasá tenke selu. Avizu ne’ebá la dehan sa’e karreta Governu ka lae, maibé kuandu para ona iha fatin ne’e tenke selu sentavu 0,25,” Prezidente AMD hateten jornalista sira, iha salaun Delta Nova, Dili, sesta ne’e.
Prezidente AMD hatutan estabelesimentu estasionamentu iha kapitál Dili funsiona ba transporte hotu-hotu tantu públiku no Governu, presiza kontribui bainhira utiliza hela.
“Nune’e iha tinan ida-ne’e de’it autoridade munisípiu Dili kobre reseita rua, ida mak publisidade no estasionamentu. Maibé, estasionamentu kuaze ami la kobre hotu tanba ami-nia ema iha utioan de’it. Entaun, sai problema ida ba ita. Ita-nia emar sira labele kobre fatin liu metru 50. Purezemplu, iha Otel Timor oin, ema ida labele kobre espasu ne’e tomak. Maibé, prontu ita-nia pesoál nafatin halo kobertura,” nia hateten.
Ho kestaun ne’e, autoridade munisípiu Dili, planu tinan oin sei aumenta tan pesoál kobransa ba estasionamentu nian no sei koloka mós iha área Cristo Rei nian.
“No, tinan oin ami mós sei estabelese tan estasionamentu iha Merkadu Manleuana maibé sei prepara lai fasilidade hodi atende ba komunidade. Ida-ne’e komunidade kestiona no dehan ami selu maibé tenke hadi’a fatin ne’e ho di’ak no seguru. Entaun, tinan oin AMD tau iha planu nune’e hein de’it, planu ne’e pasa ka lae,” nia dehan.
Nia husu ba ministru relevante atu planu no tau orsamentu ba munisípiu Dili, kapitál nasaun nian.
“Ha’u atu husu ba membru Governu sira hotu atu hotu-hotu tau atensaun ba asuntu ne’e tanba Dili presiza orsamentu hodi hadi’a. Tanba se lae, hosi osan alokadu ba AMD millaun $13 ne’e la to’o. Tanba hosi orsamentu ne’e ba de’it programa rua mak merenda eskolár ho montante millaun $3 maibé ida-ne’e ba sentavu 0,42 kada ema. Se kuandu aumenta entaun lá to’o no programa seluk mak lixu ne’ebé selu ba kamioneta 50 ne’ebé loron-loron rekolla lixu iha sidade Dili,” nia hateten.
Reseita hosi estasionamentu ne’ebé MAE rekolla hahú hosi 2017 to’o 2023 ne’e ho totál hamutuk $181.499.15 no tinan 2017 ne’e konsege rekolla $8.011,80; tinan 2018 hamutuk $27.702.60; tinan 2019 hamutuk $27.591.15; tinan 2020 iha $11.792.00; tinan 2021 iha $17.717.09; tinan 2022 iha $31.908.05 no tinan 2023 ne’e MAE rekola hosi fonte estasionamentu ne’e hamutuk $15.849.45.
Reseita hosi fonte estasionamentu Merkadu Taibese, Colmera, Avenida Liberdade Imprensa, Avenida 20 de Abril, Travessa Tafui, Jardin 5 de Maio no Avenida 25 de Maio.
Estasionamentu ne’ebé mak implementa iha kapitál Dili ne’e bazeia ba dekretu-lei Númeru 3/2017, 22 marsu, kona-ba zona estasionamentu ho durasaun limitada.
Kona-ba reseita publisidade nian hahú hosi 2017 to’o 2023 ne’e MAE kontribui reseita $926.134.63 ba kofre Estadu ne’ebé rekolla hosi fonte publisidade iha territóriu Dili, maibé ba tinan ne’e kontribui reseita $30.606.09.
Osan kontribuisaun reseita ba kofre Estadu ne’e bazeia ba dekretu-lei númeru 51/2016 ne’ebé mak ko’alia kona-ba lisensiamentu publisidade, maibé dekretu-lei ne’e mós halo ona alterasaun ba dekretu-lei númeru 31/2017.
Jornalista : Osória Marques
Editór : Cancio Ximenes
