OÉ-CUSSE, 04 setembru 2023 (TATOLI – Provedoria Direitu Umanu no Justisa (PDHJ, sigla portugés), segunda ne’e oferese formasaun kona-bá direitu umanu ba intervasaun militár sira nian iha situasaun difisil ba FALINTIL-Forsa Defeza Timor-Leste (F-FDTL), postu Sikone, Rejiaun Administrativa Espesiál Oé-Cusse Ambeno (RAEOA).
Formasaun ne’e realiza durante semana ida, hahú hosi segunda to’o sábadu semana ne’e, ho partisipante maioria F-FDTL hamutuk na’in-58 inklui feto tolu.
Notísia relevante: Forsa Armada planeia destaka kompañia independente ho estatutu autónomu iha RAEOA
Provedór Direitu Umanu no Justisa, Virgílio Guterres, hateten, formasaun ne’e kona-bá kna’ar FALINTIL-FDTL nian ba direitu umanu, nu’udar obrigasaun PDHJ nian tuir lei haruka, atu promove direitu umanu no boa-governasaun, tanba iha Lei númeru 7/2004, 26 maiu, haktuir ámbitu atuasaun provedór envolve mós F-FDTL nian.
Formasaun ne’e ho objetivu atu fasilita forsa militár sira, intende no komprende liuliu atu aplika iha sira-nia servisu fatin no komunidade nia leet, tanba prezensa forsa iha komunidade nia leet, tenke lori seguransa no onra katak, komunidade senti onradu no seguru bainhira, ita-nia forsa sira mós iha sira-nia leet.
“Durante formasaun semana ida, materia barakliu kona-bá direitu umanu iha área ba situasaun konflitu ba iha situasaun sira-ne’ebé ejize intervensaun militár hanesan Estadu oinsá forsa sira-nia atuasaun iha ne’ebá,” Provedór Virgílio Guteres ‘Lamukan’, ko’alia iha Sikone, Oé-Cusse.
Nune’e mós forsa sira hala’o kna’ar tuir kódigu profisaun ne’ebé iha, la sees hosi respeitu ba direitu komunidade nian atu hetan protesaun seguransa.
Nia dehan, formasaun ne’e la’ós tanba F-FDTL sira durante ne’e la tau importánsia ba asuntu direitu umanu, maibé iha nasaun barak ejizénsia sira-ne’ebé ba forsa sira atu halo intervensaun ba situasaun ruma, sempre akontese uzu esesivu ne’e iha, la’ós iha Timor de’it
Tuir nia, iha relatóriu tama kona-bá atuasaun militár ne’e, hanesan kazu foin daudaun akontese Liquiçá, kazu ne’e sai referénsia, maibé ida-ne’e la’ós ne’e de’it, maibé iha kedas Lei númeru 7/2004, 26 maiu, iha artigu tolu (3) kona-bá ámbitu atuasaun provedór ne’e, F-FDTL hanesan parseriu direitu umanu.
Komandante F-FDTL postu Sinone, Oé-Cusse, Kapitaun Infantaria, Jonats Iong, agradese ba prezensa PDHJ iha postu kompañia Charli Oé-Cusse, bele fahe matéria kona-bá direitu umanu ba membru forsa sira.
“Direitu umanu ne’e universál tebes, maibé ita hanesan servidór militár, ita haree kona-bá direitu umanu militár nian, importante tebes mai ami, tanba iha ne’e membru sira maioria rekrutamnetu 2021 no 2022, entaun oportunidade ne’e hanesan buat foun ba sira, entaun agradese tanba bele aprende durante semana ida iha Oé-Cusse” nia orgullu.
Notísia relevante: Falur husu Atoni-oan keixa membru ne’ebé halo problema ho povu
Jornalista: Abílio Elo Nini
Editór: Evaristo Soares Martins
