DILI, 21 setembru 2023 (TATOLI)—Xefe bankada CNRT iha Parlamentu Nasionál (PN), Deputadu Duarte Nunes, hateten CNRT hasoru malu hodi hala’o ona komunikasaun ho bankada FRETILIN kona-ba eleisaun kandidatu komisáriu Komisaun Antí-Korrupsaun (CAC, siglá portugés).
Notísia Relevante: CNRT sei buka konsensu ho bankada parlamentár molok eleisaun komisáriu CAC
“Ami hasoru malu iha loron hirak liu ba no ami halo ona komunikasaun. Agora, hein reuniaun líder bankada iha aban (sesta, 22 setembru) deside ajenda ba plenária hodi hala’o eleisaun,” Xefe bankada ne’e hateten ba Agência TATOLI iha uma fukun PN, kinta ne’e.
Deputadu Duarte Nunes la fó sai rezultadu komunikasaun bankada kona-ba konkordánsia atu hili kandidatu ida hosi kandidatu na’in-rua ne’ebé Governu propoin.
“Ne’e la’ós ba públiku. Iha ona no ami ko’alia tiha ona. Iha ona konkordánsia ne’e internal, labele publika uluk. Buat ne’ebé ami ko’alia, kontaktu halo tiha ona, ne’ebé hein eleisaun,” nia hateten,
Xefe bankada FRETILIN, Deputadu Aniceto Longuinhos Guterres Lopes, hateten agora tempu ona atu hapara kultura no esperiénsia sira buka blokeia malu de’it.
Nia hateten, FRETILIN agora iha postura polítika foun mak hakarak kolabora ba interrese Estadu nian, tanba ne’e Deputadu FRETILIN sira sempre tuir prinsípiu ne’e.
Prezidente Parlamentu Nasionál, Maria Fernanda Lay, hateten ida-ne’e negosiasaun Xefe bankada ida-idak nian mak ko’alia ba malu, nune’e nia-parte la ko’alia no meza rasik seidauk simu informasaun, tanba nia parte foin ajenda iha reuniaun líder bankada iha sesta (22/09) aban mak determina ninia eleisaun ba komisáriu CAC.
Tuir lei atu hili komisáriu CAC presiza maiória absoluta hosi Deputadu ne’ebé marka prezensa, pelumenus 3/4 hosi Deputadu ho funsaun efetiva.
Jornalista : Nelson de Sousa
Editór : Cancio Ximenes
