DILI, 18 setembru 2023 (TATOLI)—Xefe bankada CNRT iha Parlamentu Nasionál, Deputadu Duarte Nunes, hateten CNRT sei halo komunikasaun hodi hetan konsensu ho bankada parlamentár sira seluk liuliu bankada FRETILIN molok eleisaun ba kandidatu komisáriu Komisaun Anti-Korrupsaun (CAC, siglá portugés).
Notísia Relevante: FRETILIN: Kandidatu komisáriu CAC mesak pontensiál maibé depende ba votasaun
“Tempu badak ami hasoru malu, tanba hakarak ka lakohi bankada boot rua ne’e tenke lian ida iha konsensu, se laiha konsesu mak labele. Governu haruka kandidatu mai, kandidatu na’in-rua (2) ita tenke ko’alia ba malu hakarak kandidatu ida-ne’ebé, molok hakat ba eleisaun,” nia hateten ba jornalista sira iha uma fukun PN, segunda ne’e.
Presiza konsensu tanba atu hili komisáriu CAC presiza maiória absoluta hosi Deputadu ne’ebé marka prezensa, pelumenus 3/4 hosi Deputadu ho funsaun efetiva.
Nia dehan, kandidatura na’in-rua ne’e Governu submente mai kompleta identidade pesoál ho esperiénsia maibé desizaun iha votasaun mak deside, nune’e tenke iha konsensu atu haree kandidatu sé mak independente.
“Se dehan muda lei ne’e fasil hela, maibé ba ami la’ós kestaun atu muda lei, tanba banhira muda lei mak ita sei iha hatudu liman ba malu nafatin. Tanba, iha maiora simples de’it ida mai ami tau ona, maibé ita hakarak ema ne’ebé independente, entaun tenke iha konsensu ne’e importante,” nia hateten.
Xefe Bankada KHUNTO, Olinda Guterres, hateten prontu apoiu kandidatu ne’ebé Governu propoin maibé tenke haree sira-ne’ebé iha kapasidade.
Vise bankada PLP, Deputadu Abel dos Santos, hateten prontu fó apoiu no prefere atu hili kandidatu ne’ebé mak atu lidera instituisaun CAC tenke haree ema indepedente ka neutru la inklina iha partidu ruma.
Nune’e, nia fiar kandidatu ne’ebé Governu aprezenta mai iha kapasidade.
Vise Ministru Asuntu Parlamentár, Aderito Hugo da Costa, hateten Governu aprova hodi propoin ona kandidatu komisáriu CAC méritu iha área ne’e, nune’e tuir mai PN tenke ajenda maibé loke espasu bankada parlamentár halo loby hodi hetan konsensu, tanba Governu propoin kandidadu na’in-rua la’ós uniku.
Notísia Relevante: Formalmente PN seidauk simu kandidatu komisáriu CAC
Jornalista : Nelson de Sousa
Editór : Cancio Ximenes
