DILI, 14 setembru 2023 (TATOLI)—Deputadu hosi bankada FRETILIN iha Parlamentu Nasionál (PN), David Dias Ximenes ‘Mandati’, hateten kandidatu Komisáriu Komisaun Anti-Korrupsaun (CAC, siglá portugés) na’in-rua ne’ebé IX Governu Konstituisionál propoin ne’e mesak ema pontensiál ne’ebé atu lidera instituisaun refere maibé depende ba votasaun iha PN.
Notísia Relevante: Governu propoin Sérgio Hornai no Rui dos Santos ba kargu Komisáriu CAC
“Prontu, merese nu’udar timoroan, ida Sérgio nia serbisu la’o hela no agora nia in-ativu no prosesu barak mak suspende hela. Iha ne’eba, no ema sira hosi funsionáriu CAC mai to’o iha ne’e dala-rua ka dala-tolu ezije para Komisáriu CAC tenke ita nomea lalais ona para lori ba. Maibé, ami dehan buat ne’e Governu ita kooperativu, Governu lori mai, ami sei aprova tau kedas nia fatin, sóke atrazu ne’e iha. Nia (Sérgio) prestasaun hatudu di’ak ho profisionál hala’o duni. No ida seluk (Kandidatu Rui Pereira dos Santos) mós nia atetude no karáter di’ak. Iha funu laran mós ita koñese di’ak, sira-ne’e di’ak, agora depende ba votasaun mak haree,” Deputadu Mandati hateten ba jornalista sira iha uma fukun PN, kinta ne’e.
Governu liuhosi reuniaun Konsellu Ministru (KM), kuarta (13 setembru 2023) horisehik, aprova proposta rezolusaun ne’ebé aprezenta hosi Primeiru-Ministru kona-ba naran sira hanesan Sérgio de Jesus Fernandes da Costa Hornai no Rui Pereira dos Santos ne’ebé propoin ba PN ba kargu Komisáriu CAC hodi hetan aprovasaun.
Tuir lejizlasaun ne’ebé vigora, naran sira-ne’ebé propoin hosi Governu agora sei analiza no vota hosi PN no sira-nia designasaun sei presiza maiória absoluta hosi Deputadu ne’ebé marka prezensa, pelumenus 3/4 hosi Deputadu ho funsaun efetiva.
Mandatu Komisáriu CAC, Sérgio Hornai, ramata ona iha janeiru 2023, nune’e iha mandatu VIII Governu Konstituisionál propoin José da Costa Ximenes (antigu Prokuradoria Jerál Repúblika) ba Komisáriu CAC maibé PN la konsege diskute to’o ohin loron.
Nune’e, Deputadu Mandati hateten, Parlamentu Nasionál (PN) agora hein proposta formalmente hosi Governu hodi realiza iha eleisaun.
Notísia Relevante: FRETILIN-CNRT: Komisáriu CAC foun tenke hala’o serbisu ho independente
Jornalista : Nelson de Sousa
Editór : Cancio Ximenes
