DILI, 08 fevereiru 2023 (TATOLI)—Vise Bankada FRETILIN iha Parlamentu Nasionál (PN), Deputadu Antoninho Bianco, no Xefe Bankada CNRT, Deputadu Duarte Nunes, hateten Komisáriu Komisaun Antí Korrupsaun (CAC, siglá portugés) foun mai tenke hala’o serbisu ho indepedente.
Notísia Relevante: Komisáriu CAC Sergio Hornai nia mandatu ramata iha 21 janeiru
“Aprezenta ema-ne’ebé indepedente duni, implementasaun lei ne’e la haree ba kór, la haree hosi líder sira-nia influénsia maibé haree ba saida mak lei hateten,” Vise Bankada FRETILIN ne’e hateten ba jornalista sira iha PN, kinta ne’e.
Bankada Fretilin laiha kandidatu atu aprezenta no sei apoiu kandidatu ne’ebé Governu aprezenta, no importante kandidatu ida prenxe kriteiru legál no iha esperénsia durante ne’e asume ona serbisu iha área méritu domina serbisu CAC ne’e rasik, bele iha relasaun di’ak ho Ministéiru Públiku.
Tanba ne’e, nia dehan, kandidatu Eis Prokuradór Jerál Repúblika (PJR), José Ximenes, ne’ebé Governu aprezenta hanoin iha esperiénsia tanba asume kargu hanesan Prokuradór Jerál Repúblika (PJR) mandatu to’o daruak ne’e signifika iha koñesimentu.
“Tanba CAC hala’o serbisu Ministéiru Públiku nian, signifika nia tun fali nia grau, maibé tanba kestaun méritu ninia ne’e kapasidade atu assume,” nia hateten.
Tan ne’e, nia hateten, hein kandidatu ne’ebé Governu aprezenta iha plenária bele deside Komisáriu ida lori aspirasaun órgaun soberania sira no ema hotu nian, hafoin bele harii nia estrutura reforsa CAC hodi asegura implementasaun lei no óinsa mak kombate korrupsaun.
Xefe Bankada CNRT, Deputadu Duarte Nunes, hateten tuir lei iha proposta Governu mak propoin mai Parlamentu Nasionál atu diskute.
“Agora, proposta mai se monu ba hotu-hotu nia laran ita korúm ita ba vota, se la monu ita sei dada uitoan,” nia hateten.
Bankada CNRT sei dúvida ho kandidatu ne’ebé agora iha tanba iha serbisu balun hala’o ona, nune’e hanoin katak presiza hamutuk ho bankada Parlamentár sira seluk hodi haree didi’ak kona-ba kandidatu.
Nune’e, nia dehan, ema ida labele halis ba ida-ne’e no halis ba fali ida-ne’eba, presiza ema ida brani hatudu kapasidade katak ne’e loos no ne’e sala, tenke independente no hatudu profisionalizmu mezmu hosi partidu ki’ik ema bele fiar.
Tuir ajenda, kinta ne’e, loloos iha ajenda reuniaun lidér bankada Parlamentár sira atu diskute kona-ba eleisaun komisáriu CAC foun maibé adia fali ba loron seluk.
Jornalista : Nelson de Sousa
Editór : Cancio Ximenes
