DILI, 15 setembru 2023 (TATOLI)—Prezidente Parlamentu Nasionál, Maria Fernanda Lay, hateten seidauk simu formalmente kandidatu komisáriu Komisaun Anti-Korrupsaun (CAC, siglá portugés) ne’ebé IX Governu Konstituisionál propoin ona.
Notísia Relevante: Governu propoin Sérgio Hornai no Rui dos Santos ba kargu Komisáriu CAC
“Ha’u seida’uk simu. Ha’u haree iha jornál ita-boot sira (jornalista) mak hakerek, maibé ami seidauk simu. Ida-ne’e sei ko’alia tanba presiza 3/4 Deputadu para aprova. Klaru katak tenke iha konsensu, sé mak ita atu dudu ba komisáriu CAC nian,” Prezidente PN ne’e hateten ba jornalista sira iha uma fukum PN, sesta ne’e.
PN hein Governu bele submete formalmente kandidadu komisáriu CAC no bainhira submete ona mak PN sei fó prioridade tau ba ajenda iha plenária hodi bele halo eleisaun ona.
Governu liuhosi reuniaun Konsellu Ministru (KM), kuarta (13 setembru 2023) ne’e, aprova proposta rezolusaun ne’ebé aprezenta hosi Primeiru-Ministru kona-ba naran sira hanesan Sérgio de Jesus Fernandes da Costa Hornai no Rui Pereira dos Santos ne’ebé propoin ba PN ba kargu Komisáriu CAC hodi hetan aprovasaun.
Tuir lejizlasaun ne’ebé vigora, naran sira-ne’ebé propoin hosi Governu agora sei analiza no vota hosi PN, no sira-nia designasaun sei presiza maiória absoluta hosi Deputadu ne’ebé marka prezensa, pelumenus 3/4 hosi Deputadu ho funsaun efetiva.
Mandatu Komisáriu CAC, Sérgio Hornai, ramata ona iha janeiru 2023, nune’e iha mandatu VIII Governu Konstituisionál propoin José da Costa Ximenes (antigu Prokuradoria Jerál Repúblika) ba Komisáriu CAC maibé PN la konsege diskute to’o agora.
Notísia Relevante: FRETILIN: Kandidatu komisáriu CAC mesak pontensiál maibé depende ba votasaun
Jornalista : Nelson de Sousa
Editór : Cancio Ximenes
