DILI, 27 setembru 2023 (TATOLI)—Prezidente Parlamentu Nasionál (PPN), Maria Fernanda Lay, rekomenda ba Plan International iha Timor-Leste haforsa edukasaun sívika ba joven sira.
Country Diretor Plan Internasionál, Fátima Estrela Soares, hateten durante ne’e Plan International servisu hamutuk ho Grupu Mulher Parlamentár Timor-Leste (GMPTL) tanba iha ona nota entendimentu ne’ebé haree kona-ba oinsá protesaun ba labarik no mós protesaun hosi violénsia ba iha labarik feto ho feto sira.
Aleinde fahe programa sira-ne’ebé durante ne’e iha ona bazea ba planu estratéjiku Plan Internasionál nian no mós área sira-ne’ebé kobre oinsá mak haree hamutuk no kolabora malu.
“Prezidente Parlamentu Nasionál fó rekomendasaun balun oinsá haforsa liután ami-nia intervensaun liuliu atu haree kona-ba edukasaun sívika ba iha foinsa’e sira. Tanba ne’e, ami-nia haree foku ida realiza oinsá haforsa liután joven sira entermu sira-nia kapasidade, maibé oinsá haree mós valór moris bazeia ba ita-nia kultura respeita malu, ida-ne’e mak ami diskute ho Prezidente PN,” Fátima Estrela Soares hateten ba jornalista sira hafoin ramata enkontru ho PPN iha uma fukun PN, kuarta ne’e.
Nia hateten, ko’alia mós iasuntu kona-ba komemorasaun loron internasionál ba labarik feto iha loron 11 outubru ne’e, hanesan kampaña boot ne’ebé Plan Internasionál sei hala’o.
“Ne’ebé, iha loron 01 outubeu ne’e, labarik feto ida sei sai Prezidente Parlamentu Nasionál durante oras balun nia laran. Durante enkontru ne’e, Prezidente Parlamentu Nasionák espresa hakarak serbisu hamutuk. Ami kontente bele kolabora,” nia hateten.
Plan Internasionál durante ne’e serbisu hamutuk ho GMPTL hodi haree liu ba lei protesaun labarik ne’ebé PN aprova ona no Prezidente Repúblika promulga ona, agora diskute ba oin oinsá halo mekanizmu sensibilizasaun oinsá sosiedade, liuliu labarik no foinsa’e sira hatene lei ne’e rasik.
Aleinde n’e, hametin programa haforsa igualidade jéneru atu bele transforma kondisaun balun ne’ebé haree liu kauza ba igualidade.
Jornalista : Nelson de Sousa
Editór : Cancio Ximenes
