COVALIMA, 04 outubru 2023 (TATOLI)—Komisaun Nasionál ba Eleisaun (CNE, sigla Portugés) hala’o edukasaun sívika faze dahuluk no daruak iha postu administrativu hitu iha Covalima hodi prepara ba eleisaun suku ne’e finaliza ona.
“Ia finaliza ona hala’o edukasaun sívika iha postu administrativu hitu iha munisípiu Covalima iha suku ne’ebé mak identifikadu,” Komisáriu CNE Destakadu Aileu no Covalima, Carlito Martins, hateten ba Agência Tatoli iha edifísiu CNE Covalima, Tabakolot, kuarta ne’e.
Nia hateten, prosesu hala’o edukasaun sívika ne’e CNE hakarak hala’o iha territórriu suku iha munisípiu Covalima, maibé haree ba tempu tanba ne’e hala’o de’it iha postu hitu no suku ne’ebé mak identifikadu.
“CNE hala’o edukasaun sívika iha postu administrativu hitu iha suku ne’ebé mak identifika, maiória ami hala’o edukasaun sívika la’ós iha suku 30 maibé hala’o de’it iha aldeia no suku ne’ebé identifikadu,” nia hateten.
CNE hala’o edukasaun sívika ho objetivu atu partilla informasaun kona-ba lala’ok eleisaun suku no papél xefe suku bazeia ba lei númeru 9/2016 iha artigu 8.
Tuir oráriu, CNE Covalima hala’o edukasaun sívika faze dahuluk hahú iha postu Administrativu Fohorem iha suku Dato-Tolu iha loron 04 setembru 2023), iha postu administrativu Fatululik ne’e hala’o iha suku Taroman iha aldeia Makous iha loron 05 setembru 2023.
Iha suku Fatululik, aldeia Aitoun iha loron 06 setembru 2023, iha postu Fohorem iha suku Dato-Rua iha aldeia Aitos iha loron 07 setembru 2023, iha postu Fatumea hala’o iha suku Fatumea no Nanu iha loron 08 setembru 2023 no iha postu administrativu Tilomar hala’o iha suku Lalawa iha loron 11 setembru 2023 ne’ebé finaliza iha postu administrativu Maucatar hala’o iha suku Matai iha loron 12 setembru 2023.
CNE identifika postu no suku ne’ebé hala’o edukasaun sívika iha faze daruak hahú iha postu administrativu Maucatar iha loron 22 setembru 2023, postu Suai hala’o iha suku Suai Loro iha loron 23 setembru 2023.
Iha postu Zumalai ne’e hala’o iha suku Lepo iha loron 25 setembru 2023, iha suku Mape hala’o iha loron 26 setembru 2023, suku Usecai hala’o iha loron 27 setembru 2023, iha suku Zulo iha loron 28 setembru 2023 no suku Tashilin hala’o iha aldeia Kuluoan iha loron 29 setembru 2023 no iha postu administrativu Suai hala’o iha suku Beco iha aldeia Halik iha loron 30 setembru 2023.
CNE prepara fo formasaun ba OSE
Entretantu, Komisáriu Komisaun Nasionál ba Eleisaun (CNE, sigla Portugés) destakadu Aileu no Covalima, Carlito Martins, hala’o breafing hodi prepara formasaun kona-ba papél CNE iha Eleisaun Suku ba Ofisiál Supervizaun Eleisaun (OSE) iha Covalima.
“Sorumutu ohin ho pesoál Ofisiál Supervizaun Eleisaun (OSE), hanesan introdusaun hosi ha’u nune’e OSE iha informasaun adekuadu bainhira sira tama faze formasaun sira bele dezempeña papél iha suku no aldeia,” nia dehan.
Preparasaun CNE ba iha eleisaun suku sei koloka OSE hahú iha postu administrativu, suku no to’o aldeia sira hodi halo supervizaun ba aktu hosi Sekretáriu Tékniku Administrasaun Eleitorál (STAE) hodi koloka materiál eleisaun iha suku sira.
Tuir Komisaun Nasionál ba Eleisaun (CNE-siglá Portugés) sei fó kapasitasaun liuhosi formasaun ba Ofisiál Supervizaun Eleisaun (OSE) hala’o durante loron rua ne’ebé hahú iha loron 09 outubru 2023 to’o 10 outubru 2023.
Jornalista : Celestina Teles
Editór : Cancio Ximenes
