BOBONARO,20 outubru 2023 (TATOLI)-Polísia Nasionál Timor-Leste (PNTL) Munisípiu Bobonaro hahú hosi loron 23 fulan-outubru to’o loron 06 fulan-novembru 2023 sei suspende provizóriu atividade organizasaun grupu arte-marsiál no rituál sira iha suku 50 hodi halo preparasaun ba eleisaun xefe suku ne’ebe sei hala’o iha loron 28 fulan-outubru 2023.
Komandante Polisíamentu Komunitária munisípiu Bobonaro, Primeiru Sarjentu, Ernesto Godinho Marqués, informa suspensaun ne’e bazeia ba orientasaun hosi Komando Jerál PNTL ho númeru referensia 560,CG-PNTL/X/2023, 13 outubru.
Notísia Relevante:PNTL Bobonaro la autoriza eleitór sira uza atributu arte-marsiál no rituál iha eleisaun suku
“Ba atividade arte-marsiál hotu provizoriamente hahú hosi ohin ba oin taka, depois eleisaun ramata mak re-ativa fali, ne’e orientasaun hosi komandante munisípiu,” nia hato’o asuntu ne’e bainhira desimina lei númeru 5/2017 ba grupu arte marsiál sira iha postu administrativu Maliana,sesta ne’e.
Hatán kona-ba suspensaun atividade ne’e, Konseleiru Persaudaraan Setia Hati Terate (PSHT) munisípiu Bobonaro, Arlindo de Oliveira, aseita ho desizaun ne’e tanba meius ida atu halo prevensaun ba konflitu no krime sira durante preparasaun to’o eleisaun suku ramata.
“Ami prontu kumpre orientasaun ne’e,tánba ne’e ami sei komunika sei halibur ami líder sira,estrutura hosi munisípiu, postu administrativu to’o suku sira núne’e hato’o mensajen ne’ebé ke ita-nia Komando PNTL fó sai ne’e hodi suspende atividade provizóriu hodi kontribui ba atividade ne’ebé ita-nia Estadu realiza ne’e,”Nia afirma.
Iha sorin seluk, Sekretáriu Jerál Kmanek Oan Rai Klaran (KORK) munisípiu Bobonaro, Agustino dos Santos Mouzinho, hateten tempu badak sei halo enkontru ho treinadór sira iha suku hotu hodi kumpre orientasaun hosi Komando jerál PNTL.
“Ami sei partilla informasaun ne’e to’o baze atu núne’e bainhira rona informasaun suspende karik sira lalika hafodak tanba ne’ e provizóriu de’it, ha’u hanoin la problema, ami hosi KORK preparadu oinsá para atu halo servisu hamutuk ho Instituisaun PNTL, autoridade sira liu-liu ho arte-marsiál sira seluk hodi fó susesu ba eleisaun ne’e,”Nia hateten.
Entertantu, tuir dadus ne’ebe fó sai hosi KRAM katak fatin treinu hosi Ikatan Kera Sakti (IKS) hamutuk 76, Persaudaraan Setia Hati Terrate (PSHT) 74, Kmanek Oan Rai Klaran (KORK) 47 maka ejiste iha munisípiu Bobonaro.
Notísia Relevante:Feto 12 iha Bobonaro sei kompete ho mane sira iha eleisaun lideransa komunitária
Jornalista: Sergio da Cruz
Editór: Agapito dos Santos
