BOBONARO, 17 outubru 2023 (TATOLI) – Tuir lista ne’ebé Sekretariadu Tékniku Administrasaun Eleitorál (STAE) Munisípiu Bobonaro simu hosi meza asembleia suku 50 iha sesta loron 13 semana kotuk ho totál kandidatura na’in-198. Hosi númeru ne’e feto nai’in-12 mak sei kompete ho mane sira iha eleisaun lideransa komunitária ne’ebé sei realiza iha loron 28 outubru.
Diretór STAE Munisípiu Bobonaro, Mariano Viegas Amaral, subliña, número feto hirak-ne’e mai hosi postu administrativu Atabae feto tolu iha suku Hataz, Rairobo, Aidabaleten. Postu administrativu Balibo feto rua iha suku Leo-Hitu no Batugade.
Hosi parte postu administrativu Cailaco, kandidata na’in rua iha suku Goulo no Manapa, iha postu administrativu Lolotoe iha kandidata na’in-ida iha suku Opa-Villa. Enkuantu iha postu administrativu Maliana Vila kandidata na’in-haat mai hosi suku Lahomea na’in-rra, Ritabou ida no Raifun ida.
Notísia relevante: AFMD identifika ona feto potensiál 13 kompete iha eleisaun suku 2023
“Iha postu administrativu Bobonaro suku 18 laiha kandidata feto, ita haree persentajen entre feto ho Mane, ita bele dehan feto ne’e mínimu tebes, tanba feto 12 deit, mane mak 168 kedas,” Diretór Mariano, informa ba Jornalista sira iha Maliana, tersa ne’e.
Hafoin simu prosesu aprezentasaun kandidatura, STAE halo kedas verifikasaun buletin ezemplu ba kandidatu no kandidata sira-nia naran kompletu.
Dirijente STAE Munisípiu Bobonaro ne’e konfirma, daudaun buletin hirak-ne’e submete ona ba nasionál atu halo impresaun iha gráfika nasionál.
“Ita-nia ofisiál ida agora daudaun fiksu iha fatin impresaun buletin votu, núne’e atu asegura katak impresaun buletin ne’e kada suku ho kandidatu nia naran no fotografía labele sees malu,” nia katak.
Atu hasoru eleisaun suku ne’e, STAE Munisípiu Bobonaro destaka ona Pesoál STAE Apoia Suku (PSAS) ba suku 50 atu identifika sentru votasaun, koordena ho autoridade komunitáriu hanesan xefe suku no xefe aldeia sira, alende ne’e halo mós edukasaun votante ba eleitór sira.
“Liuliu ba inan-aman sira-ne’ebé maka lahatene lee no hakerek no ba eleitór foun sira ne’ebé mak foin atu vota iha 28 mai ne’e,” nia esplika.
Hahú ohin, 17/10 to’o tersa 18/10 ne’e halo formasaun ba xefe aldeia sira no Pesoál STAE Apoia Aldeia (PSAA) iha postu administrativu tolu hansan Atabae, Lolotoe no Bobonaro no loron 19 to’o 20 sei kontinua ba postu administrativu Maliana, Balibo no Cailaco.
Notísia relevante: PAM Bobonaro husu joven sira asegura eleisaun suku
Jornalista : Sérgio da Cruz
Editór : Evaristo Soares Martins
