DILI, 23 outubru 2023 (TATOLI) – Espesialista Brigada Xineza foun na’in-12 to’o ona Timor -Leste atu fó atendimentu iha Hopsitál Nasionál Guido Valadares (HNGV) liuhosi asiténsia médika ba populasaun sira.
“Ami-nia ekipa sira ne’e atu apoia HNGV, entaun husi ami-nia apoiu ne’e liuhosi akordu Governu Timor-Leste ho Governu Xina. Ekipa ne’ebé mak agora daudaun iha ne’e hamutuk 12 hodi apoia atendimentu ba timoroan sira”, Diretora Sentru Internasionál ba Kooperasaun no Komunikasaun ba Sichnan Komisaun Saúde Li Ling, dehan iha HNGV, ohin.
Nia husu ba ekipa médiku foun sira atu nafatin fó atendimentu di’ak ba populasaun Timor-Leste liuhosi espesialidade ne’ebé mak iha.
“Ha’u hakarak husu ba ekipa foun sira tenke servisu ho amizade iha HNGV hodi bele fó asisténsia téknika ba popualsaun sira iha Timor-Leste tuir espesialidade ne’ebé mak iha”, nia hateten.
Iha fatin hanesan, Diretora Ezekutiva Hospitál Nasionál Guido Valadares (HNGV), Cecilia Barros Mendoça, informa Timor-Leste ho Xina servisu hamutuk durante tinan 10-resin, apoia ba rekursu umanu iha HNGV hodi fó atendimentu ba populasaun sira iha Tmor-Leste.
“Ekipa medika xineza sira ne’e durante servisu iha ita-nia rain tuir rotasaun kada tinan rua, entaun agora ekipa foun mak mai fali atu kontinua servisu iha HNGV hodi fó atendimentu ba ita-nia populasaun sira ne’ebé mak atu mai fó tratamentu saúde iha ne’e”, Cecilia Barros Mendoça, esplika.
Diretór Klínika iha HNGV, Marcelino Correia, dehan HNGV ohin simu ekipa médika Xineza foun ne’ebé troka ekipa tuan durante hala’o servisu iha ne’e.
“Sira ne’ebé mak ohin ita simu ne’e, sira-nia mandatu tinan rua hodi hala’o servisu iha HNGV atu fó tratamentu ba ita-nia populasaun sira, entaun husi espesialista sira-ne’e ba área kuidadu intensivu, espesialista ba kardiolojia, sirurjiaun, espesialista obstretia no sinekelojia, espesialista ortopedia,espesialista tardisionál medisina xineza, entaun ba oin sira ne’e sei ba kada departamentu idaidak hodi fó tratamentu ba ita-nia pasiente sira”, nia konklui.
Notísia relevante : Ekipa médika xineza 12 konklui ona misaun iha Timor-Leste
Jornalista : Felicidade Ximenes
Editór : Zezito Silva
