DILI, 31 outubru 2023 (TATOLI)–Bee Timor-Leste, Empreza Públika (BTL, E.P) iha opsaun hodi fornese bee ba área projetu Pelican Paradise, hanaran Dili Sidade Istórika, ne’ebé lokaliza iha Tasi-tolu.
“BTL iha koordenasaun di’ak ho empreza Pelican Paradise, ne’ebé iha opsaun tolu ba sira, dahuluk mak dada bee hosi sistema ne’ebé fornese bee ba iha Portu Tibar lori balun ba sira, opsaun daruak maka BTL iha posu ida iha área Tibar ne’e ekipa BTL halo teste ona hein para dada ba sira, ami-nia kanu sei iha dalan, ne’ebé koordenasaun nível tékniku la’o di’ak hela, opsaun ikus maka karik seidauk dada, BTL iha karreta tangki tula bee ba sira,” Prezidente Konsellu Administarsaun BTL, E.P, Carlos Peloi dos Reis, hateten, foin lalais ne’e, iha ninia knaar fatin, Caicoli.
Nia dehan, bainhira aprezenta opsaun ne’e, empreza aseita, ne’ebé daudaun iha hela prosesu nia-laran.
“Opsaun daruak atu dada ne’e mak seidauk tanba prosesu aprovizionamentu ba ekipamentu sira ne’e sei la’o hela,” nia akresenta.
BTL, Empreza Pelican no TradeInvest hasoru ona Diresaun Nasionál Terras no Propriedade (DNTP) hodi klarifika kona-ba estatutu rai, nune’e bele fura bee.
“Daudaun ami-nia ekipa sei koordena hla ho DNTP, espera ida-ne’e bele rezolve lalais tiha hodi bele dada ona bee, bainhira dada tiha bee, empreza selu ba Governu bazeia ba uzu,” nia esplika.
Notísia relevante : Progresu serbisu Pelican Paradise: Konklui prosesu konkursu no serbisu la’o hela
Pelican Paradise haree iha área dezenvolvimentu propriedade hodi halo dezeñu no kalkulasaun kustu, nune’e ba implementasaun sei loke konkursu públiku.
Empreza Malázia ne’e sei halo konstrusaun otél, apartamentu no rezidénsia hamutuk unidade 287 ho kustu millaun $100, ne’ebé iha faze dahuluk sei hahú projetu iha rai ho medida ektare 16, ne’ebé tuir planu sei finaliza iha tinan 2026.
Aleinde ne’e, empreza sei dezenvolve área ospitalidade, turizmu no seluk tan atu atrai turista sira mai vizita Timor. Iha faze dahuluk projetu ne’e, empreza nafatin hein Governu halo libertasaun terrenu iha área Tasi-tolu, hafoin kontinua projetu faze daruak.
Pelican Paradise mós sei halo dezenvolvimentu turístiku ho totál investimentu millaun $700. Área dezenvolvimentu turístiku tuir planu sei harii iha rai ektare 558, iha zona entre Tasi-tolu no Tibar, ne’ebé sei inklui unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.
Dezenvolvimentu ne’e sei permite kriasaun postu traballu ba ema 1.500 iha faze konstrusaun no 1.300 postu traballu permanente.
Jornalista : Antónia Gusmão
Editora : Julia Chatarina
