BOBONARO, 07 novembru 2023 (TATOLI) – Ekipa hosi Ministériu Edukasaun, tersa ne’e halo enkontru ho dirijente Ensinu Báziku Sentrál (EBC, sigla portugés) Gumer ho dirijente eskola filiál sira no autoridade lokál suku Lourba, hodi diskute kona-bá funsionamentu prosesu ensinu no aprendizajen ba estudante sira.
Diretora EBC Gumer, Gulhermina de Jesus Gusmão, esplika, estudante sira hosi sentru no Ensinu Báziku Filiál (EBF) Nazare la partisipa aula tanba trauma ho konfrontu entre suku Lourba no Carabau, loron (02/11) to’o (03/11) ne’e.
Notísia relevante: PM Xanana halo diálogu ho komunidade Lourba no Karabau
“Ami depois feriadu ne’e, horisehik mak foin komesa eskola, hahú horisehik sira la mai, ohin mos sira la mai, estudante sira-ne’e iha EBC Gumer 304 no EBF Nazare iha alunu 317, sira-ne’e barak liu hosi suku Lourba no minoria hosi suku Carabu no parte Tasi-Balu,” nia informa ba jornalista sira, iha kna’ar-fatin, hafoin enkontru.
Diretora ne’e mós enkoraja inan-aman sira atu fó korajen ba oan sira tama fali aula hodi tuir prosesu ensinu no aprendizajen hanesan bainbain.
“Labele ta’uk tán ho situasaun ne’ebé mak liu ona, tanba ita-nia seguransa sei iha atu asegura ita,” Diretora eskola ne’e apela.
Ba kestaun ne’e, Xefe suku Lourba, Lino de Jesus, fó-sai katak, komesa tuku 09:00-resin autoridade lokál koordena ho parte Polisía Nasionál Timor-Leste (PNTL) eskuadra postu administrativu Bobonaro tún direita ba terrenu avizu tama sai bairru, hahú hosi Lourba ba to’o Tasi-Balu.
“Ami avizu ne’e atu haruka sira bele mai partisipa iha sira-nia estudu ne’e hansan bainbain, dalaruma tán de’it akontese problema ne’e labarik sira mak idade ki’ik sira trauma la marka prezensa iha eskola, entaun oinsá mak ita bele fó korajen ba sira atu sira bele ativu fali iha eskola,” Xefe suku ne’e hateten.
Tuir nia, estudante balu la marka prezensa tanba sira-nia uma ema sunu hotu.
“Sira-nia uma ahi haan, konsertenza sira-nia farda no livru sira-ne’e ahi haan hotu, maibé sira-nia dadus ha’u seidauk konfirma,” nia relata.
Tuir observasaun Agência Tatoli iha terrenu nota katak, movimentasaun transporte públiku inklui ema la’o hosi diresaun suku Lourba ba Carabu hahú normál tanba ekipa konjunta kompostu hosi PNTL munisípiu Bobonaro, Batallaun Orden Públika, Unidade Espesiál Polísia (UEP) no FALINTIL-Forsa Defeza Timor-Leste (F-FDTL) iha hela terrenu hodi garante situasaun hakmatek ba komunidade hotu.
Notísia relevante: Vítima hosi kazu Lourba iha tratamentu ospitalár
Jornalista : Sérgio da Cruz
Editór : Evaristo Soares Martins
