DILI, 15 novembru 2023 (TATOLI) – Konsellu Ministru (KM) halo alterasaun daruak ba Dekretu Governu n.º 19/2022, loron 11 fulan-maiu, kona-ba klasifikadór orsamentál ne’ebé aprezenta husi Ministra Finansa, Santina Cardoso.
Tuir komunikadu, diploma ida ne’e altera ona husi Dekretu Governu n.u 11/2023, loron 25 fulan-outubru. Maske nune’e, iha ámbitu prosesu preparasaun ba Proposta Lei Orsamentu Jerál Estadu (OJE) ba tinan 2024, identifika ona nesesidade atu halo alterasaun adisionál ba klasifikadór ekonómiku despeza nian atu aumenta detallu no transparénsia iha konta públika.
Rekorde katak Governu aprova ona iha, 06 setembru, alterasaun dahuluk ba dekretu Governu refere.
Objetivu alterasaun ne’e atu fasilita kompreensaun ba klasifikasaun foun hosi reseita no despeza públika, ho ninia objetivu atu agrupa kategoria sira iha grupu lima nível dahuluk nian ne’ebé korrespondente ho kategoria anteriór sira hodi transforma kategoria sira ne’ebé iha daudaun ne’e sai sub kategoria hodi halo klasifikasaun ekonómika despeza nian sai nível haat.
Nune’e, aproveita hodi halo mós detallu ba sub kategoria operasaun extra-orsamentál nian nomós halo korresaun uitoan ba klasifikasaun.
Tuir dekretu Governu kona-ba klasifikadór orsamentál hatudu katak enkuadramentu Orsamentu Jerál Estadu no jestaun finanseira públika estabelese OJE ne’ebé espesifika sufisientemente reseita no despeza.
Espesifikasaun reseita no despeza OJE realiza liuhosi utilizasaun klasifikasaun orsamentál. Klasifikadór orsamentál hosi orsamentu jerál kompostu hosi klasifikadór orgániku, ekonómiku no funsionál.
Notísia relevante: Konsellu Ministru altera dekretu-lei klasifikadór orsamentál
Jornalista: Osória Marques
Editora: Maria Auxiliadora
