Ministru Justisa konvoka reuniaun interministeriál diskute kona-ba espansaun Aeroportu Komoro

DILI, 15 Juñu 2026 (TATOLI)—Ministru Justisa, Sergio Hornai konvoka reuniaun hamutuk ho Ministru Transporte no Komunikasaun, Miguel Marques Manitelo, Sekretáriu Estadu Asuntu Toponímia no Organizasaun Urbana, Germano Santa Brites Dias, inklui entidade relevante seluk, Segunda ne’e, hodi diskute kona-ba projetu espansaun Aeroportu Internasionál Prezidente Nicolau Lobato, Komoro, Dili.

“Ekipa ministeriál ho komisaun konjuta halo ona sira-nia serbisu desde tinan 2020, dalan ida-ne’e ita fó kontinuidade ba ita-nia obra boot, liliu ba alargarmentu Aeroportu ne’ebé sai hanesan preukupasaun ba ita hotu,” Ministru Justisa hato’o ba Jornalista sira hafoin prezide reuniaun iha sala reuniaun Ministériu Justisa, Kolmera.

Governante ne’e dehan, haree ba Aeroportu Komoro nia pista badak, tanba ne’e presiza halo alargamentu.

“Komisaun reuni hodi aserta hanoin balun oinsá mak ita fó kontinuidade tanba haree ba tempu evolui maka’as, entaun ita buka deteta informasaun ba malu, liliu husi Ministériu Transporte no Komunikasaun no Autoridade ba Aeroportu Timor-Leste ninian, nune’e mós entidade sira ne’ebé nakait ho prezensa Sua Eselénsia Ministru no Sekretáriu Estadu ba serbisu sira ne’ebé ita presiza koordena, karik ita presiza halo medida ka despaisu administrativu, entaun presiza iha koodenasaun,” nia akresenta.

Notísia relevante : Konstrusaun Aeroportu Comoro, komunidade afetadu 57 hasoru SETP

Husi aprezentasaun ohin nota katak, antes ne’e iha uma-kain hamutuk 252 afetadu ba projetu, maibé hafoin Governu halo ona indenizasaun, afetadu redús ba uma-kain 32.

Nune’e, membru Governu na’in-tolu ne’e sei konvoka reuniaun fali hodi halibur no kompila informasaun detallu hodi bele hato’o iha reuniaun Konsellu Ministru.

“Projetu espansaun Aeroportu Nicolau Lobato to’o agora tinan-neen nia laran ona. Tanba ne’e Governu hakarak fó biban para projetu ne’e iha kontinuasaun. Obra ne’e presiza lori tempu. Ita hakarak pelu menus to’o 2028 obra bele konklui no bele entrega hodi nune’e ita bele uza,” nia katak.

Bazeia ba desizaun Tribunál, rai ne’ebé dezenvolve Aeroportu ne’e pertense ba objetu Estadu.

“Entaun ho ida-ne’e ita halo desizaun atubele hahú projetu espansaun Aeroportu Komoro,” nia tenik.

Aleinde ne’e, iha tempu badak Governu sei halo despaisu administrativu ba uma-kain 32 afetadu ba projetu espansaun Aeroportu.

“Pedidu mai ona, tama ona iha ha’u-nia gabinete, hein de’it ha’u hanesan Ministru Justisa, ha’u iha responsabilidade no klareza ida, iha nota informasaun tékniku kompletu ha’u sei halo desizaun,” Ministru afirma.

Ekipa interministeriál halo ona levantamentu ba ai-horis, uma no rate sira nune’e sei entrega ba Ministériu Transporte no Komunikasaun hanesan na’in ba projetu atu bele dezenvolve projetu Aeroportu Komoro.

Ekipa interministeriál sei halo diálogu ho uma-kain afetadu projetu tanba balun husik fatin tanba simu ona indenizasaun maibé balun okupa nafatin, tanba ne’e iha hela negosiasaun.

“Kuandu negosiasaun hotu ita sei notifika iha modalidade rua de’I,  livre voluntáriu hodi sira bele voluntáriu hasees husi ne’ebá ou ita halo obrigatóriu,” Governante  ne’e hatutan.

Ministériu Justisa sei notifika uma-kain 32 iha loron-10 to’o 15 nia laran hodi hamamuk fatin.

“Afetadu sira iha ona koñesimentu dezde tinan 2020 to’o mai ohin loron. Aprosimasaun sempre nakloke, maibé husu para sidadaun hotu-hotu bele kolabora kuandu Governu halo despaisu administrativu, entaun koopera,” nia hato’o.

Jornalista      : Natalino Costa

Editora           : Julia Chatarina