DILI, 04 dezembru 2023 (TATOLI)— Sekretáriu Estadu Komunikasaun Sosiál (SEKOMS), Expedito Dias Ximenes, hateten iha proposta Orsamentu Jerál Estadu (OJE) 2024 ba SEKOMS ho montante millaun $6.4 ne’e, prioridade liu fó apoia ba rádio komunidade 17 iha territóriu nasionál.
“Ohin, ha’u esplika ba deputadu sira katak preokupasaun ne’e pertinente tebes no foin daudaun SEKOMS fó tiha ona apoiu ba rádiu komunidade 17 ho osan rihun $101 hodi apoiu ba sira-nia atividade operasionál, ekipamentu no transporte nian,” Governante ne’ e hateten ba jornalista sira, hafoin halo audiénsia públiku ho Komisaun G, Parlamentu Nasionál, segunda ne’e.
Liga ho asuntu ne’e, nia dehan, Parlamentu Nasionál mós preokupa difikuldade ne’ebé rádiu komunidade sira atravesa bazeia ba deputadu sira-nia monitorizasaun iha munisípiu, nune’e deputadu sira husu atu RTTL ho nia kobertura liuliu ba notísia ne’ebé fó sai tenke iha balansu.
“Ha’u hateten katak iha polítika editoriál mídia ida-idak nian, maibé RTTL televizaun públiku ka Estadu nian konserteza la’o tuir polítika Estadu nian. Ida-ne’e mak ohin SEKOMS hateten hela ba Komisaun G Parlamentu Nasionál nian,” nia dehan.
Hosi orsamentu jerál estadu (OJE) 2024 ho montante millaun $6.4 ne’e, millaun $1.9 ba saláriu no vensimentu, bens no servisuhamutuk rihun $954, transferénsia Públika millaun $2.3, kapitál menór rihun $100 no kapitál dezenvolvimentu iha millaun $1.80.
Orsamentu ba Transferénsia Públika boot tanba millaun $2 ba iha Rádio Televizaun Timor-Leste ba saláriu vensimentu no bens servisu nian, maibé kapitál dezenvolvimentu ne’e IX Governu konstituisional liuhosi SEKOMS sei konstrui tan tore tolu ida iha Lautém, Viqueque no Ermera.
“Tore tolu ne’e ho nia objetivu atu alarga tan kobertura RTTL nian no mós loke opurtunidade ba empreza sira-ne’ebé hakarak uza tore ne’e hodi halo transmisaun ba kobertura ruma hosi instituisaun Estadu no empreza privada ruma,” nia hateten.
Kona-ba Agência Tatoli, SEKOMS hatán, Tatoli iha nia orsamentu rasik maibé tanba tutela iha SEKOMS mak ohin Tatoli hamutuk ho RTTL hodi akompañia SEKOMS, maibé ohin mós deputadu sira hateten Tatoli ho RTTL hanesan órgaun Estadu nian nafatin fó atensaun hodi halo balansu ba notísia.
“Ho sira-ne’e hotu deputadu sira apresia ho atividade SEKOMS durante fulan haat-lima nia laran ne’e. Tanba IX Governu konstituisional nia atensaun ba rádiu komunidade, imprensa no ba iha mídia sosiál. Ha’u mós esplika katak ho avansu teknolojia ne’ebé iha no konserteza iha nia editoriál ba mídia sosiál, maibé presiza iha lei komunikasaun sosiál ita presiza haree tanba Konsellu Imprensa ne’ebé monitoriza ba mídia hotu-hotu iha Timor-Leste,” nia dehan.
Tanba, tuir nia, presiza iha artigu ida-ne’ebé ko’alia kona-ba mídia sosiál nian, nune’e Konsellu Imprensa bele tau matan ba nia editoriál tanba informasaun hotu-hotu ne’ebé públika iha mídia sosiál iha balun ne’ebé loos no iha barak mak hoax (falsu).
Jornalista : Osória Marques
Editór : Cancio Ximenes
