DILI, 05 dezembru 2023 (TATOLI) – Universidade Nasionál Timor Lorosa’e (UNTL) no Institutu Politékniku Betanu (IPB) submete ona dadus estudante foun ba tinan akadémiku 2024/2025 hamutuk 5.120 ba Ministériu Ensinu Superiór, Siénsia no Kultura (MESSK) atu hetan konsiderasaun.
Reitór UNTL, João Soares Martins, afirma submisaun dadus estudante foun ne’e mai husi rejime jerál, nune’e bainhira lista rejime espesiál ne’ebé ministériu prepara bele iha kombinasaun ho dadus ne’ebé mai husi universidade.
“Ami halo ona ezersísiu boot ba tinan 2024 ne’e. Ami loke tan oportunidade ba estudante foun asesu mai UNTL hamutuk 4.720. Dadus sira ne’e mai husi kada fakuldade”, reitór informa ba Tatoli iha kampus UNTL, ohin.
Nia dehan, durante ne’e, kada fakuldade halo sira-ninia verifikasaun ba kondisaun sira atu akumula estudante nain hira iha tinan 2024 ne’e. “Sira mak hatene depois aprezenta mai Konsellu Jerál UNTL nia atu halo análiza. Totál ne’ebé kada fakuldade relata ne’e maka agora UNTL submete ona ba Ministériu Ensinu Superiór”.
Iha sorin seluk, Prezidente IPB, Acácio Cardoso Amaral, afirma katak sira-ninia dadus ba estdudante foun tinan 2024 nian laihadiferensa ho 202. Sira matein ho estudante 400 atu asesu ba IPB, maibé dadus sira ne’e prevee de’it tanba kada tinan mós IPB la kompleta to’o númeru sira ne’e.
“Ita-nian alvu prepara kondisaun ba estudante foun 400 tanba ita hakarak koloka sira iha fakuldade rua mak hanesan Produsaun Animál 200 no Konstrusaun Sivíl 200, maibé kada tinan estudante sira ladún iha interese”, nia realsa.
Ministru Ensinu Superiór, Siénsia no Kultura, José Honório Jerónimo, salienta katak nia seidauk simu dadus estudante foun atu asesu ba instituisaun ensinu superiór rua ne’e, maibé nia husu ba sira atu labele simu barak liu.
“Ha’u seidauk simu rezultadu husi UNTL ho IPB nian kona-ba dadus atu hatama hira, maibé ha’u fó hatene ona ba sira labele simu barak liu tanba tenke haree sira-nian teste ho rigór no kumpre lei, nune’e labele hamosu fali kestaun ruma iha futuru”, afirma.
Jornalista: Tomé Amado
Editora: Maria Auxiliadora
