OÉ-CUSSE, 18 dezembru 2023 (TATOLI) – Ministériu Administrasaun Estatál (MAE), segunda ne’e abertura formasaun ba xefe suku eleitu no re-eleitu hamutuk na’in-18 iha Rejiaun Administrativa Espesiál Oé-Cusse Ambeno (RAEOA), hafoin hetan vitória iha eleisaun órgaun suku ba períodu 2023-2030.
Formasaun ne’e realiza durante loron tolu, hahú segunda to’o kuarta semana ne’e (18-20/11/2023), iha salaun administrasaun Numbei, Oé-Cusse.
Notisia relevante: PM Xanana husu xefe suku eleitu kontrola populasaun hado’ok hosi krime
Diretór Nasionál Apoia Administrasaun Suku hosi MAE, Celestino Marques, hateten, objetivu hosi formasaun ne’e atu hasa’e koñesimentu xefe suku sira iha área tolu kona-bá administrasaun suku, kna’ar kompeténsia iha suku no dokumentu sira.
“Objetivu primeiru, atu eleva sira-nia koñesimentu kona-bá sira-nia kna’ar no kompeténsia, ne’ebé maka konsagra iha iha Lei númeru 9/2016, kona-bá saida mak sira-bele halo no saida mak labele halo, nune’e sira bele iha koñesimentu di’ak hodi ezerse funsaun durante tinan hitu,” Celestino Marques, ba jornalista sira iha Oé-Cusse, segunda ne’e.
Objetivu segundu, atu eleva mós sira-nia koñesimentu iha área jestaun finanseira suku ba alokasaun orsamentu Estadu suku no oinsá nia ezekusaun no relatóriu oinsá, knaar no kompeténsia oinsá, tanba ne’e liga ba responsabilidade.
“Ikusliu, liuhosi formasaun ne’e, sira-mós bele iha koñeismentu oinsá atu halo jestaun ba funsionamentu livru 18 administrasaun suku, ne’ebé maka daudaun iha suku hotu-hotu, nune’e iha koñesimentu di’ak nune’e implementa servisu ho di’ak,” nia katak.
Sekretáriu Rejinál ba Asuntu Administrasaun sesante, Martinho Abani Elo, reprezenta suku suku 18 iha Oé-Cusse, agradese ba Governu liuhosi Ministériu Administrasaun Estatál, tanba bele kria polítika kapsitasaun ba xefe suku sira.
“Ha’u hanoin liuhosi formasaun ne’e, importante ba xefe sira, tanba balu foun, ne’e presiza partisipa iha formasaun, nune’e bele hala’o polítika no programa Governu iha suku ho di’ak no aseguradu,” nia orgullu.
Notísia relevante: PR Horta iha esperansa xefe suku eleitu serbisu besik liután komunidade
Jornalista: Abílio Elo Nini
Editór: Evaristo Soares Martins
