iklan

NASIONÁL, ELEISAUN, HEADLINE

PM Xanana husu xefe suku eleitu kontrola populasaun hado’ok hosi krime

PM Xanana husu xefe suku eleitu kontrola populasaun hado’ok hosi krime

DILI, 28 outubru 2023 (TATOLI)Primeiru-Ministru (PM), Kay Rala Xanana Gusmão, husu ba povu Timor-Leste atu partisipa iha eleisaun komunitária hodi hili kandidatu xefe suku ne’ebé sira fiar ba ukun, tenke hakbesik-an ba povu hodi rezolve povu nia problema no kria pás ba povu hotu hosi aldeia no suku hotu-hotu.

“Ha’u mai nu’udar populasaun aldeia Lakoto, ha’u-nia espetativa katak ita hein xefe aldeia, xefe suku, inklui delegadu sira bele servisu haree povu nia situasaun, liu-liu kona-ba seguransa, ema labele baku malu, labele tama arbiru arte-marsiál tanba arte ne’e labele oho malu, buat ne’e la tama atu estraga fali joven sira. Tanba Governu iha programa tinan-lima nia laran atu desentraliza to’o iha suku no aldeia, nune’e bele iha posibilidade boot liu atu hato’o nesesidade povu iha administrasaun ba povu,” PM Xanana hateten hafoin ezerse votu, iha aldeia Lakoto, suku Balibar, postu administrativu Kristu Rei, munisípiu Dili, sábadu ne’e.

Xefe Governu dehan, bainhira autoridade sira garante moris hakmatek ba povu maka sei fó fó rezultadu di’ak atu kontribui ba dezenvolvimentu Timor-Leste.

Primeiru-Ministru tuir votasaun ba Eleisaun Orgaun Suku 2023 iha aldeia Lacoto, suku Balibar, postu administrativu Kristu Rei, munisípiu Dili.

Notísia relevante Ekipa responsável hahú distribui materiál eleisaun komunitária ba sentru votasaun

PM Xanana to’o iha sentru votasaun Eskola TK aldeia iha dadeer tuku 07:30 otl hamutuk ho populasaun sira kontinua akompaña kedas mini kampaña hosi kandidatu xefe aldeia Lacoto no xefe suku sira hodi hato’o sira-nia vizaun no misaun ba populasaun antes hala’o votasaun iha oras 09:00 otl.

Iha suku Balibar, kandidatu xefe suku ema na’in-neen hanesan Afonso Pereira (atuál xefe suku), Agostinho Saldanha Fernades, Elisa Pereira, Gilyanes da Silva Soares João Gaspar Pinto Fatima, no João Misquita Soares.

Tuir dadus hosi Sekretariadu Tékniku Administrasaun Eleitorál (STAE), suku Balibar ho totál populasaun 786 maka ezerse sira-nia direitu votu hodi hili órgaun suku.

STAE rasik hala’o ona distribuisaun buletin votu ba munisípiu 13 inklui Rejiaun Administrativa Espesiál Oé-cusse Ambeno (RAEOA) ho kuantidade folla 942.696 no livru 18853.92 buletin votu ne’ebé distribui ba suku 442 iha territóriu.

Eleisaun órgaun suku 2023 ho tema, “Atu hametin pás no unidade iha ita-nia país, mai vota iha eleisaun órgaun suku iha 28 outubru 2023” kompete direta hosi kandidatura suku hamutuk ema na’in-200-resin.

Tuir dadus hosi STAE, suku 10 mak la partisipa iha eleisaun tinan ne’e, tanba xefe suku hirak ne’e pertense hosi suku foun sira hanesan munisipiu Dili iha suku foun 5, Aileu suku foun rua, Manatutu rua, Viqueque-Ossu suku foun ida.

Situasaun eleisaun iha aldeia Lacoto la’o ho ambiente pás no akompaña direita hosi ekipa STAE no parte Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) hamutuk ho autoridade no juventude sira.

Jornalista     : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!