DILI, 04 janeiru 2024 (TATOLI)- Prezidente Parlamentu Nasionál, Maria Fernanda Lay ho Kardeál Arkidoseze Metropolitana Dili, Dom Virgílio do Carmo da Silva SDB, preokupa aktu “seksuál dezkontroladu” – livre, afeta númeru kazu VIH-SIDA ( Vírus da imunodeficiência humana Síndrome da Imunodeficiência Adquirida, HIV/AIDS, sigla inglés) aas iha rai-laran.
Notísia relevante: https://tatoli.tl/2023/12/08/don-virgilio-kardeal-legaliza-lokalizasaun-servisu-seksu-komersial-kontra-maromak-nia-ukun-fuan/
Durante sorumutu PPN akompaña ho estrutura meza ho Kardeál, kinta ne’e, iha Lecidere, pontu importante sira ne’ebé sai diskusaun mak liga mós ho ita-nia juventude la’ós feto ho mane de’it, maibé ita problema ida liga ba LGBT ne’ebé agora sai asuntu la’ós Timor-Leste nian de’it maibé mundu tomak, ita-nia pozisaun oinsá liga ho kultura.
“Liga mós ho juventude moras kontajioza prostituisaun, ne’ebé liga ho osan ita-nia nesesidade bázika ho osan, obriga ita-nia sosiedade mós iha prátika balun ita tenke regula iha aspeitu ne’e para bele proteze sira husi moras kontajioza HIV-SIDA nia númeru sa’e,” Prezidente PN, hateten ba jornalista sira hafoin sorumutu.
Pontu seluk mós ne’ebé durante sorumutu ko’alia, Prezidente PN dehan, hanoin ida ne’e importante liliu ba ita-nia sosiedade juventude ninian ne’ebé soe bebé hanoin ita tenke tau-matan no sai preokupasaun sosiedade Timor-Leste nian tanba hanoin ita-nia kultura la’ós hanesan ne’e.
“Ne’ebé ami sente ho konsultasaun Parlamentu hala’o ho igreja liliu ho dioseze tolu ne’e (Dili, Baucau, Maliana) bele fó ajuda mós ami ho hanoin saida mak bele halo hamutuk ba Estadu Timor-Leste hodi proteze ita-nia kultura ho sosiedade liliu família Timór nian, ida ne’e mak importante” líder órgaun lejislativa ne’e hateten.
Kardeál Arkidoseze Metropolitana Dili, Dom Virgílio do Carmo da Silva, mós dehan durante sorumutu ko’alia asunntu ne’ebé ohin loron mosu iha ita-nia rai-laran liliu kona-ba prostituisaun, free sex, soe bebe.
“Isu sira ne’ebé liga liu ba toka ituan tau hamutuk hanoin atu hare tok, ami fó ami-nia hanoin ituan atu sira mós tetu hamutuk ba oin saida mak ita hamutuk ho Parlamentu iha lejislatura ida ne’e karik ita bele halo diferensa ruma hodi kontribui hadia di’ak liu tan ita-nia sosiedade, buat barak ne’ebé ita haree ita-nia sosiedade hamenus ituan buat lubun ida ne’ebé la’o iha ita-nia rai-laran” nia hateten
Nune’e parte PN sei haree lejislasaun ruma ba preokupasaun ne’ebé iha.
Jornalista: Nelson de Sousa
Editór: Rafael Ximenes de A. Belo
