DILI, 26 janeiru 2024 (TATOLI)-Membru Parlamentu Nasionál (PN), liuhusi deputada Partidu Demokrátiku (PD), Maria Teresa Gusmão no deputada Partidu Libertasaun Populár (PLP), Hermenegilda da Costa Laurentina, husu Governu kontrola uzu plástiku iha sentru estabelesimentu komersiál sira.
Deputada PD, Maria Teresa Gusmão, husu Governu liuhusi ministéiru relevante atu kontrola loza xineza sira iha kapitál Dili, ne’ebé kontinua uza plástiku.
Notísia relevante: https://tatoli.tl/2022/02/04/implementasaun-politika-zero-plastiku-eduka-komunidade-kuidadu-uza-saku-biodegradavel/
Tanba, dekretu-lei númeru 37/2020 loron 23 setembru kona-ba alineasaun, importasaun no produsaun saku, embalajen no objetu seluk ba plástiku, tama ein-vigór, hahú utiliza saku biodegradável.
“Implementasaun lei ne’e mak fraku tebe-tebes, presiza monitorizasaun bebeik hamosu konsiénsia ema nian atu kumpre regra ne’ebé iha no sansaun hodi ema ta’uk bainhira kontra lei ne’ebé iha, tanba ita hare mezmu ho dekretu-lei zero plástiku bandu ona, maibé iha loza xineza sira barak kontinua uza plástiku nafatin,” Deputada PD ne’e hateten ba Ajénsia TATOLI iha uma-fukun PN, sesta ne’e.
Nune’e, Deputada husi bankada Governu ne’e sujere parte ezekutivu liuhusi entidade relevante atu kontrola másimu ba loza xineza sira ne’ebé kontinua uza plástiku.
Nune’e mós, Deputada PLP, Hermenegilda da Costa Laurentina, hateten, iha oitavu Governu implementa ona zero plástiku, loza sira labele uza plástiku, nune’e presiza obedese lei ne’ebé iha, nune’e agora iha polítika IX Governu mak presiza kontinua.
“Agora polítika IX Governu mak tenke kontinua, serake lei fó vantajen ba ita nia komunidade sira, entaun ita tenke kontinua hodi minimiza tiha plástiku, até agora loza xineza sira sei kontinua uza plástiku, hanoin ministériu relevante tenke tau atensaun,” membru órgaun lejislativa ne’e rekomenda.
Aliénde ne’e, Deputada husi bankada opozisaun ne’e, observa mós katak daudaun kondisaun lixu iha Dili laran barak tebes, nune’e presiza konsiénsia pesoál ema hotu nian, tanba problema lixu la’ós Governu no PN de’it, maibé sosiedade timoroan tomak nian ita tenke iha konsiénsia soe lixu iha fatin hodi ita-nia rai ne’e moos no prevene inundasaun sira iha tempu udan.
Jornalista: Nelson de Sousa
Editór: Rafael Ximenes de A. Belo
