DILI, 04 fevereiru 2022 (TATOLI)—Diretór Foo Hau Kiun (FHK) Group, Pascoal Suri Mali, konsidera implementasaun polítika zero plástiku hosi Governu di’ak tanba bainhira loja boot sira hahú uza saku biodegradável hodi fa’an fali ba komunidade ne’ebé sosa sasán ho objetivu eduka uza saku ho kuidadu.
“Sé ita fó gratuita ba komunidade, sira fila soe fali no fó risku ba ambiente, maibé bainhira sira mai sosa sasán tenke sosa ho saku biodegradável hodi tau sasán, maka sira hanoin ona tenke lori sakola rasik lae sosa, entaun sira uza ho kuidadu no la soe,” Dirijente empreza hateten ba Agência TATOLI, iha ninia knaar fatin, sesta ne’e.
Notísia relevante: Embalajen tipu styrofoam hahú lakon iha Timor-Leste
Nune’e, Pascoal Suri, dehan implementasaun polítika ne’e di’ak tebes tanba ajuda kuidadu ambiente ba tinan naruk.
“Desde polítika zero plástiku ne’e hahú, ami hola parte ba implementasaun ho hanoin hakarak halo susesu programa ne’e, ne’ebé ba ami-nia grupu laiha problema ho programa Governu ne’e tanba di’ak ba ambiente,” nia akresenta.
FHK Group hanesan na’in ba loja Lita Store, Leader, no Lisun, desde inísiu Dekretu-Lei númeru 37/2020 loron 23 setembru kona-ba alienasaun, importasaun no produsaun saku, embalajen no objetivu seluk ba plástiku, tama ein vigór, hahú utiliza saku biodegradável.
“Saku biodegradável ne’ebé importa, ita koko atu prodús balun iha rai-laran, maibé ita tenke haree matéria no mákina ne’ebé iha, inklui marketing ba sasán sira ne’e mak seidauk di’ak, entaun ita kontinua importa hosi nasaun Xina ho medida kiik, natoon no boot,” nia dehan.
Enkuantu, dezafiu ne’ebé durante FHK hasoru hafoin halakon saku plástiku mak komunidade seidauk kompreende didi’ak objetivu hosi polítika zero plástiku.
Molok FHK komunika ho parseiru iha rai-li’ur hodi prodús saku biogradável no importa, sei konsulta uluk ho parte Sekretaria Estadu Ambiente (SEA) kona-ba matéria ne’ebé utiliza ba produsaun no bainhira hetan aprovasaun mak prodús no importa.
Biban ne’e, Dirijente empreza husu ba Governu hodi sosializa polítika zero plástiku ba komunidade.
“Husu ba Governu hanesan na’in ba programa ne’e, tenke fó sai uluk objetivu saida mak ita hakarak atu halo hodi halakon plástiku ne’e, nune’e komunidade ne’ebé la hantene bele hatene. Nune’e ba maluk sira hotu tenke kontribui ba implementasaun programa ne’e tanba saida mak Governu halo ne’e di’ak ba ita hotu,” nia tenik.
Jornalista : Arminda Fonseca
Editora : Julia Chatarina
