DILI, 19 fevereiru 2024 (TATOLI)–Koordenadór Komisaun Ezekutiva ba estabelesementu zona ekonomia Oé-cusse, João Mendes Gonçalves, segunda ne’e, hasoru malu ho Primeiru-Ministru (PM), Kay Rala Xanana Gusmão, hodi relata progresu serbisu hafoin simu knaar.
“Aprezenta planu ba Primeiru-Ministru tanba Konsellu Ministru hili ha’u lidera Komisaun Ezekutiva ida hodi halo serbisu ba estabelesementu zona ekonómika dezenvolvimentu Oé-cusse-Ambeno nian. Ha’u iha mandatu fulan-12 para halo serbisu ida-ne’e. Ha’u sei esforsu para molok fulan-12 bele ramata serbisu ne’e hodi aprezenta iha Konsellu Ministru,” João Mendes relata hafoin ramata reuniaun, iha Palásiu Governu.
Planu dahuluk maka sei prodús relatóriu Estadu rejiaun nian hodi haree situasaun atuál saida mak halo tiha ona hodi nune’e planu saida mak presiza halo tan iha futuru ba dezenvolvimentu Rejiaun Administrativa Espesiál Oé-cusse Ambeno (RAEOA) nian.
“Bainhira ami halo tiha relatóriu Estadu rejiaun nian mak ami bele prepara planu dezenvolvimentu ba Oé-cusse. Molok ne’e sei prepara enkuadrementu legál hodi estabelese entidade jurídika ne’ebé mak sei kaer dezenvolvimentu ekonómiku Oé-cusse hodi troka Zona Ekonomia Espesiál Merkadu Sosiál (ZEESM),” nia akresenta.
Notísia relevante : Xanana Gusmão fó pose Prezidente Autoridade RAEOA no Koordenadór ZEESM foun
Nune’e, Koordenadór komisaun no ekipa sei prepara planu, enkuadramentu, inklui projesaun orsamentál hodi lori mai Primeiru-Ministru hodi aprezenta ba Konsellu Ministru.
Daudaun Koordenadór ho Prezidente RAEOA, Rogério Lobato, hala’o ona reuniaun ho líder komunitáriu sira, setór privadu, organizaun naun governamentál balun iha Oé-cusse, inklui ho parseiru dezenvolvimentu hodi serbisu hamutuk.
“Hakarak harii sistema ida serbisu hamutuk ho parseiru dezenvolvimentu ne’ebé Autoridade mak iha poder halo desizaun no kontrolu ba apoiu ne’ebé sira fó. Ne’ebé sei kria unidade koordenasaun ida hamutuk para kada fulan-tolu halo reuniaun hodi haree progresu serbisu no kria matríz ida hodi bele kontrola di’ak liután apoia sira hosi parseiru dezenvolvimentu, hodi evita duplikasaun serbisu sobre pozisaun projetu,” nia esplika.
Daudaun sei halo hela preparasaun hodi halo rekrutamentu tanba serbisu espesífiku ne’ebé mak iha hodi prepara planu dezenvolvimentu, enkuadramentu serbisu no projesaun orsamentu presiza barak liu mak tékniku profisionál, péritu iha área setoriál hanesan pekuária, infraestrutura, sosiál, edukasaun, saúde nomós área temátika hanesan rekursu umanu.
Koordenadór no ekipa sei haree hela nesesidade ba rekrutamentu tanba daudaun sei iha hela planu estudu
Ekipa ne’e halo serbisu ho orsamentu RAEOA nian, tanba ne’e Autoridade sei fó apoia administrativu no lojístika.
Jornalista : Antónia Gusmão
Editora : Julia Chatarina
