DILI, 21 fevereiru 2024 (TATOLI)—Ministru Negósiu Estranjeiru no Kooperasaun, Bendito Freitas, halo aprezentasaun ida kona-ba progresu iha implementasaun roteiru ba adezaun Timor-Leste nu’udar membru plenu Asosiasaun Nasaun Sudeste Aziátiku (ASEAN, sigla ingles), iha ámbitu reuniaun Konsellu Ministru, kuarta ne’e.
“Hafoin aprezentasaun ne’e, Konsellu Ministru aprova projetu rezolusaun Governu kona-ba mekanizmu koordenasaun iha prosesu adezaun Timor-Leste ba ASEAN,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : PN kria komisaun eventuál akompaña prosesu adezaun TL ba ASEAN
Haree ba prosesu negosiasaun akordu oin-oin no instrumentu vinkulativu sira seluk iha planu internasionál nian sei intensifika, no tanba ninia ezijénsia no partikularidade, nune’e presiza asegura líder no reprezentasaun Estadu Timor-Leste iha negosiasaun sira ne’e.
Governu nomea Ministru Negósiu Estranjeiru no Kooperasaun nomea nu’udár Xefe Negosiadór, ne’ebé responsável hodi halo negosiasaun liuhosi halo koordenasaun ho membru Governu sira ne’ebé responsável ba kestaun ne’ebé iha hela negosiasaun.
Rezolusaun Governu ne’e estabelese kriasaun grupu traballu tékniku sira hodi akompaña pilár tolu hanesan polítika no seguransa, sósiu-kulturál no ekonómika hodi adere ba ASEAN no prevee relatóriu trimestrál sira ba Konsellu Ministru.
Grupu traballu sira-ne’e téknikamente sei koordena hosi Diresaun Jerál ba Asuntu ASEAN, ho supervizaun hosi Vise-Ministra ba Asuntu ASEAN.
“Objetivu hosi medida ida-ne’e mak atu asegura konkretizasaun efetiva hosi kompromisu ne’ebé asume ba adezaun plena ASEAN ho adosaun progresiva hosi Timor-Leste kona-ba instrumentu diferente ho natureza polítika, administrativa no lejizlativa, atubele la’o tuir sistema nasionál ho norma regulamentár no rekomendasaun ASEAN nian,” nota hosi Governu esplika.
Jornalista : Antónia Gusmão
Editora : Julia Chatarina
