COVALIMA 04 marsu 2024 (TATOLI) – Ponte Mali-Loek ne’ebé konstrui ho ai dezde Indonézia nia tempu ho métru kuaze 25, dadaun ne’e hahú dodok no difikulta movimentu transporte públiku, tanba ne’e Covalima oan tenke iha inisiativa hodi buka meiu atu hadi’a no la presiza hein Governu.
Liafaun hirak ne’e hato’o husi Komandante Autoridade Protesaun Sivíl (APC, sigla portugés), Inspetór Xefe Flávio Mendes, bainhira haree kondisaun ponte refere ne’ebé lokaliza entre aldeia Sanfuk, suku Camnasa, no aldeia Dais, suku Belekasak, iha Covalima, tanba difísil atu halo movimentu bá-mai.
Tanba ne’e, nia sujere atu manda karta ba Floresta Covalima hodi bele ko’a ai-kabelak hadi’a ponte ne’e, tanba kondisaun ponte refere presiza halo intervensaun ho urjénsia no labele hein bainhira akontese ona dezastre mak foin iha hanoin atu hadi’a.
“Tenke hanoin ona, dalan di’ak mak haruka karta ba Floresta Covalima hodi ko’a ai-kabelak no husu ajuda husi empreza sira atu ajuda. Buat hotu labele hein de’it Estadu”, nia afirma iha Santa Rosa, ohin.
Abitante Joao Amaral apresia ho inisiativa Komandante APC nian atu hadi’a provizoriamente ponte ne’e ho taka ai hodi fasilita movimentu transporte publiku depois mak kontinua hein Governu atu reabilita ponte refere.
“Maibé, Governu mós labele garante de’it ho inisiativa hirak ne’e, tenke foti desizaun ho urjénsia atu reabilita ponte tanba haree kondisaun nia durante tinan naruk ona no to’o ohin loron seidauk halo reabilitasaun”, dehan.
Diretór Servisu Munisipál Obra Públika no Transporte Covalima, Sidónio Gusmão, informa katak Governu prevee ona verba iha Orsamentu Jerál Estadu 2024 atu reabilita ponte Mali-Loek iha tempu badak.
“Kona-ba ponte Sanfuk ha’u konfirma ona ho Diresaun Nasionál Estrada no nia prosesu la’o hela. Iha tempu badak sei halo reabilitasaun, tanba ne’e hein de’it ona atu anusiu empreza sé mak atu reabilita ponte”, dehan.
Parlamentu Nasionál aprova orsamentu 2024 ba Ministériu Obra Públika hamutuk $224.279.374 ne’ebé aloka ba saláriu no vensimentu $9,187.551, bens no servisu $21,802.827, tranferénsia públika $155.000.000, kapitál menór $198.400 no kapitál dezenvolvimentu $38,090.594.
Husi orsamentu refere aloka ba programa estrada no ponte $51,515.032, programa dezenvolvimentu rurál no urbana $2,804.340, programa funsionamentu no dezenvolvimentu instituisionál $13,611.520, programa agua no saneamentu $6.588,680, programa eletresidade $148.118.800 no programa laboratóriu no infraestrutura $641.000.
Jornalista: Celestina Teles
Editora: Maria Auxiliadora
