DILI, 13 marsu 2024 (TATOLI)—Governu aloka $14.400 ba profesór brazileiru hodi fó formasaun ba profesór 140 iha Timor-Leste.
“Governu liuhosi Ministériu Edukasaun (ME) no Institutu Nasionál Formasaun Dosente no Profisionál Edukasaun (INFORDEPE) aloka $1.200 ba kada profesór, hosi profesór brazileiru hamutuk na’in-12 hodi fó fomasaun ba profesór iha tékniku vokasionál hamutuk 140 iha munisípiu Baucau, Covalima, Dili, Ermera,” Prezidente INFORDEPE, Domingos Martins, informa ba Agência Tatoli iha salaun INFORDEPE Balide, kuarta ne’e.
Notísia relevante : INFORDEPE atribui sertifikadu kursu portugés ba manorin-na’in 316 iha Bobonaro
Aleinde ne’e, Governu mós fó kustu ba profesór sira ho valór $600 hodi hanorin iha Dili no ba sira ne’ebé hanorin iha munisípiu $500.
ME liuhosi INFORDEPE no Ministériu Edukasaun Brazil iha ona kooperasaun desde fulan-janeiru liubá.
“Ami iha ona nota koseptuál, ne’ebé akordu ne’e entre Ministériu Edukasaun Kooperasaun Governu Federal Brazil ho Ministériu Edukasaun Timor-Leste liuhosi INFORDEPE. Nota koseptuál prepara ona no iha fulan-janeiru liubá bainhira ami bá vizita iha Brazil, ne’ebé ita hanaran programa pilotu. Nune’e iha tinan ne’e hein implementa de’it formasaun ne’e no daudaun ne’e INFORDEPE prepara hela kondisaun balun iha eskola tékniku vokasionál ida-idak iha munisípiu,” nia akresenta.
Daudaun ne’e hein atu implementa de’it programa iha tinan ne’e nia laran, ne’ebé sei hahú iha jullu to’o dezembru 2024, hafoin iha tinan 2025 mak alarga tan bá munisípiu seluk.
Jornalista : Osória Marques
Editora : Cancio Ximenes
