DILI, 04 abríl 2024 (TATOLI)—Ministériu Edukasaun(ME), kinta ne’e, atribui komputadór no motorizada hamutuk 386 ba eskola Ensinu Báziku Sentrál (EBC-sigla portugés) 193 iha territóriu nasionál.
Ministra Edukasaun, Dulce de Jesus Soares, hateten komputadór no motorizada hamutuk 386 ne´e kompostu hosi komputadór hamutuk 193 no motorizada hamutuk 193 ba EBC sira iha territóriu la inklui Rejiaun Administrativa Espesiál Oé-cusse Ambeno (RAEOA).
“Ministériu Edukasaun iha tinan ida-ne’e distribui fasilidade sira ba ensinu báziku iha territóriu. Fasilidade hirak-ne’e mak motorizada 193 ho komputadór hamutuk 193. Motór ne’e uza hodi halo monitorizasaun ba eskola filiál sira no komputadór ne’e uza hodi fasilita gabinete tékniku, adjuntu, diretór sira hodi hala’o servisu administrasaun nian hodi halo karta no pontu ezame no uza ba internet hodi peskiza matéria ruma,” Ministra Edukasaun, Dulce de Jesus Soares, hateten ba jornalista sira, hafoin distribui motorizada no komputadór ba diretór munisípiu iha Villa Verde. .
Ministra ne´e hatutan, motorizada ho komputadór ne’e oferese ba eskola báziku sentrál ne’e la’ós diretór ka adjuntu nian maibé ne’e eskola nian, signifika katak uza hodi halo atividade eskola ne’e ninian.
Kona-ba ba osan kombustível sei la uza osan konsensoens eskolár nian, maibé uza de’it osan transporte nian,ne’ebé daudaun ne’e kada profesór sira hetan $25.
“Prátika iha pasadu ema uza osan konsensoens eskolár hodi sosa kombustível, maibé agora iha ona osan transporte ba kada profesó sira. Nune’e, husu ba diretór sira-ne’ebé uza motor sira-ne’e lalika hein loos de’it mak osan konsensoens eskolár ne’e,” nia hateten.
Diretór Jerál Edukasaun Pre-Eskolar, Ensinu Bázika no Ensinu Rekorente, Apolinario Serpa Rosa, hateten fasilidade hirak-ne’e sei distribui ba eskola ensinu báziku hamutuk 193 ne’ebé eziste iha territóriu tomak la inklui RAEOA.
Direjente ne´e haktui, kada eskola hetan motorizada no komputadór unidafe ida, enkuantu motorizada ne’e atu subtitui fali motorizada sira-ne’ebé mak eskola sira hetan iha tinan 2012 nian ne´e.
“Tanba motorizada hirak-ne’ebé hetan iha tinan 2012 ne’e barak mak avaria hotu ona no tama ona iha lelaun. Nune’e mak ita atu fó fila-fali motorizada foun ida para hodi bele fasilita sira-nia servisu, uza hodi tuir atividade sira iha munisípiu,” nia hateten.
Nia dehan, ekipamentu hirak-ne’e la’ós atu oferese ba diretór ensinu báziku sira, maibé ba operasionalizasaun ensinu báziku nian, signifika eskola nian no sira uza hodi hala’o servisu hotu iha ensinu báziku sentrál to’o ba nia filiál sira.
Entretantu, ME alende distribui komputadór ho motorizada 386 ba EBC sira, inklui mós impresora hamutuk 193.
Jornalista : Osória Marques
Editór : Cancio Ximenes
