DILI, 12 abríl 2024 (TATOLI)–Governu liuhusi Sekretaria Estadu Formasaun Profisionál no Empregu (SEFOPE), finaliza ona teste eskrita lian inglés ba kandidatu traballadór Austrália, iha munisípiu Dili ho totál kadidatu 8.337, kompostu husi feto na’in-3.592 no mane 4.745.
Ministru Juventude, Desportu Arte no Kultura, Nelyo Isaac Sarmento, hateten, serbisu iha rai-li’ur presiza duni hatene lian inglés. Tanba ne’e maka teste lian inglés ba kandidatu traballadór Austrália importante hodi bele sai traballadór kualifikadu iha merkadu traballu iha Austrália.
“Polítika ida-ne’e mak Governu halo la’ós de’it ho Austrália maibé país sira ne’ebé presiza duni timor-oan sira ne’ebé kualidade hodi presta serbisu iha sira-nia rai. Ita agradese tanba ita sei kontinua nafatin serbisu hamutuk ho Austrália la’ós tanba sira gosta ho ita-nia sistema rekrutamentu, maibé tanba sira mós gosta ho kualidade traballadór sira ne’ebé presta hela serbisu ba empregadór sira iha Austrália, ida-ne’e mak ita labele lakon no kontinua hasa’e kualidade nu’udar Timor-oan,” Ministru Nelio Isaac hateten bainhira halo abertura ba teste eskrita lian inglés ba kandaditu traballadór Dili, iha eskola primária Nuu-laran, Bairro dos Grilos sesta ne’e.
Notísia relevante : SEFOPE klarifika teste kandidatu traballadór timoroan bá servisu iha Austrália
Iha biban hanesan, Sekretáriu Estadu Formasaun Profisionál no Empregu, Rogério de Araújo Mendonça, hateten, SEFOPE realiza ona teste eskrita lian inglés ba kandidatu sira iha munisípiu hotu inklui Rejiaun Administrativa Espesiál Oé-cusse Ambeno (RAEOA) no Atáuro, enkuantu Dili mak ikus.
“Iha teste ne’e sei la haree ba kor sira hanesan polítiku, família, no grupu a ka b. Tanba serbisu hamutuk ho Governu Austrália ne’ebé tau importánsia ba transparánsia, se sira haree situasaun sira ne’e akontese maka sira retira no programa ne’e mós taka iha Timor-Leste maibé to’o ohin loron Austrália liuhusi ajénsia sira iha ne’e, sira observa programa ne’e sei la’o hla iha korridór transparánsia ka di’ak hela,” Sekretáriu Estadu, akresenta.
Governante ne’e husu ba públiku atu labele konsumu informasaun falsu sira ne’ebé espalla katak teste ba kandidatu traballadór ba Austrália SEFOPE adota sistema familiarizmu, partidarizmu ne’e laloos.
“Imi (kandidatu) 8.337 ne’e bainhira pasa barreira liu ona 25% iha ona oportunidade avansa ba teste orál ka entrevista,” Rogério informa.
Reprezentante Embaixada Austrália iha Timor-Leste, Rachel Jolly, sente onra boot hodi marka prezensa iha serimónia abertura teste lian inglés ba kandidatu traballadór sira ne’ebé sei bá serbisu iha Austrália.
“Austrália kontente bele kontinua serbisu hamutuk no kontinua apoia Governu Timor-Leste liu-liu SEFOPE iha área mobilidade laborál, programa ne’e importante tebes ba Austrália no Timor-Leste. Mobilidade laborál hanesan programa ida oferese benefísiu ba Timor-Leste no Austrália ba Indústria no traballadór sira,” Rachel Jolly, subliña.
Nia dehan, lian inglés hanesan komponente ida importante tebes iha eskema PALM nian, no ba empregu sei abilidade iha serbisu oin-oin, serbisu sira ne’e presiza nive, inglés di’ak.
“Kontente haree Governu Timor-Leste hodi halo teste lian inglés atu-bele asegura joventude-sira iha abilidade inglés ne’ebé di’ak atu nune’e bele tama iha sistema hodi nune’e bele hatán demanda hosi empregadór Austrália sira”, nia enkoraza.
Serimónia abertura ne’e partisipa hosi Ministru Juventude, Desportu Arte no Kultura , Nelyo Isaac Sarmento, Sekretáriu Estadu Formasaun Profisionál no Empregu, Rogério de Araújo Mendonça, Reprezentante Embaixada Austrália iha Timor-Leste, Rachel Jolly, Komandante Polísia Munisípiu Dili, Superintendente Xefe Orlando Gomes, Provedoria Direitu Umanu no Justisa (PDHJ, sigla portugés), Asosiasaun HAK, Komisaun Antí-Korrupsaun, no Inspesaun Jerál Estadu.
Totál kandidatu traballadór Austrália husi munisípiu 12 ne’ebé tuir ona teste lian inglés hamutuk 42.412, husi númeru ne’e sira ne’ebé partisipa mak 35.611.
Jornalista : Antónia Gusmão
Editora : Julia Chatarina
