DILI, 15 abríl 2024 (TATOLI)—Parlamentu Nasionál (PN) no Ministériu Edukasaun (ME) iha tersa (16/04) ne’e, sei halo debate ho kona-ba problema antigu manorin-na’in kontratadu.
“Aban, ita sei iha debate ho Ministra Edukasaun liga ho profesór kontratadu,” Prezidente Parlamentu Nasionál (PPN), Maria Fernanda Lay, informa liuhusi reuniaun plenária PN, segunda ne’e.
Tuir ajenda PN ne’ebé Agência Tatoli asesu, iha reuniaun plenária aban ho ajenda periudo ordem do dia, ne’ebé sei partisipa husi Ministra Edukasaun, Dulce de Jesus no parte Komisaun Funsaun Públika (KFP) hodi ko’alia kona-ba manorin-na’in kontratadu iha tinan 2023 nia .
Antes ne’e, iha loron 13 marsu tinan ne’e, Prezidente Parlamentu Nasionál, Maria Fernanda Lay, akompaña husi Prezidente Komisaun G ne’ebé trata asuntu Edukasaun, Juventude Desportu no Kultura, Armado dos Santos Lopes no membru komisaun, simu audiénsia ho reprezentante antigu profesór kontratadu sira hodi rona sira-nia preokupasaun ne’ebé durante ne’e hasoru.
Notísia relevante : Profesór voluntáriu hato’o lamentasaun ba komisaun G iha PN
“Hakarak agradese ba Prezidente Parlamentu Nasionál, Maria Fernanda Lay, tanba simu ami-nia karta audiénsia ne’ebé ami hato’o mai iha ne’e no ohin realiza enkontru,” Portavós Profesór Kontratadu, Agostinho Pinto, hateten ba jornalista sira hafoin ramata enkontru, iha sala konferénsia Parlamentu.
Durante sorumutu, manorin-na’in sira aprezenta razaun fundamentu ho sira-nia estatutu hanesan kontratadu, ho prosesu ne’e to’o ohin loron, liu-liu problema hasoru hamutuk ho ME, tanba iha lei la permite sira atu konkorre iha bolsa kandidatu tanba razaun ho diploma sekundáriu. Tanba ne’e, ohin loron sira kontinua halo asaun pasífika hodi ko’alia.
Nune’e, liuhusi sorumutu ne’e, sira relata situasaun sira ne’e PPN, ne’ebé iha momentu ne’ebá PPN mós hato’o ninia solidariedade no husu fó fulan-ida ba nia atu buka solusaun diálogu ho ME no KFP. Iha momentu hanesan husu atu hapara ona manifestasaun.
“Ami mós rona ida-ne’e no sei fó fiar tomak ba iha Prezidente nu’udar mós reprezentante povu iha órgaun soberania ida-ne’e no nu’udar sidadaun iha esperansa bele iha solusaun, tanba buat hotu ita tenke kumpre ba regra no lei ne’ebé iha,” Agostinho Pinto, dehan.
Portavós aprezenta razaun labele aplika bolsa kandidatu tanba se hatuur ona iha dekretu-lei ne’ebé iha rua de’it, katak profesór kontratadu sira ida ba ingresu espesiál, se karik nia la priense rekezitu ingresu espesiál maka tenke hetan filafali kontratu tempu indeterminadu ba profesór sira ne’ebé la prienxe rekezitu hodi hala’o funsaun administrativa iha eskola.
Prezidente Komisaun G ne’ebé trata asuntu Edukasaun iha PN, Deputadu Armando dos Santos Lopes, hateten, ida-ne’e foin dahuluk audiénsia ho profesór kontratadu sira nune’e sei enkamiña preokupasaun ba parte kompetente atu buka solusaun. Nune’e, iha aban no bainrua parte PN liuhusi komisaun G sei bolu ME no KFP hodi halo audiénsia.
Entertantu, ho hasoru malu ne’e, iha loron tuir mai komisaun G halo kedas audiénsia públika ho Ministra Edukasaun no parte KFP hodi haree oinsá buka solusaun ba antigu manorin-na’in kontratu sira.
Jornalista : Nelson de Sousa
Editora : Julia Chatarina
