Profesór voluntáriu hato’o lamentasaun ba komisaun G iha PN
DILI, 16 fevereiru 2023 (TATOLI)—Portavós Profesór Voluntáriu, José Correia, hateten sira-nia parte ohin hala’o audiénsia ho komisaun G trata asuntu Edukasaun, Juventude, Kultura no Sidadania iha Meza Parlamentu Nasionál (PN) hodi hato’o lamentasaun relasiona rezultadu publikasaun naran profesór voluntáriu hosi Ministéiru Edukasaun, Juventude no Desportu (MEJD).
Notísia Relevante: MEJD sei simu reklamasaun hosi profesór voluntáriu 1.371
“Ami ohin mai, hosi profesór voluntáriu no hosi asosiasaun rua nian hanesan Asosiasaun Manorin-na’in no Sindikatu Profesór Timor-Leste mai hato’o ami-nia ezijénsia, lamentasaun liga ba publikasaun naran profesór voluntáriu ne’ebé Ministru Edukasaun publika sai ba públiku,” portavós ne’e hateten ba jornalista sira iha PN, kinta ne’e.
Nia hateten, sira-nia parte triste tebes tanba publikasaun ne’e haree liu ba implika irregularidade ne’ebé makaas tebes.
“Irregularidade mai hosi publikasaun ema-ne’ebé mak uluk la hanorin naran sai fali, balun voluntáriu tinan barak komesa hosi 2010 to’o mai agora naran la sai. Balun fali, foin daudaun Governu hosi Ministériu Edukasaun ba verifika, iha verifikasaun sira laiha, depois verifikasaun liu tiha mak sira tama sira-nia naran mak sai. Piór liután ema balun ita bele konsidera mosu hanesan mate klamar,” nia lamenta.
Tanba, nia dehan, profesór voluntáriu balun ne’ebé naran sai ne’e dala ruma sira la hanorin iha eskola refere maibé bainhira publikasaun ne’e sai sira-nia naran mosu fali.
Nia hateten, ida-ne’e mak lamentasaun hosi ami hodi hato’o ba Parlamentu Nasionál liuhosi komisaun G asuntu edukasaun hodi husu komisaun atu husu Governu hodi bele fó atensaun ba kestaun ne’e.
Aleinde ne’e, sira husu husu ekipa konjunta entre profesór hosi asosisaun manorin-na’in sira-nia hakarak, Ministériu Edukasaun, Parlamentu Nasionál tun fila-fali ba terrenu ba eskola munisípiu ida-idak halo reverifikasaun.
Tanba, tuir nia, verifikasaun ne’ebé ministériu halo foin daudaun valida hodi publika tiha ona iha Jornál repúblika ne’e nakonu ho familiarizmu, irregularidade barak, tan ne’e implika ba kontestasaun mosu injustisa sosiál.
Irregularidade ne’e mai hosi ministériu, mezmu nune’e sira-nia parte seidauk iha dadus konkretu hira, maibé sira-nia parte hanesan vítima tanba eskola ministériu foin publika sai fatin luan tebes, maibé iha informasaun ida ka rua tama ona hosi Ainaro no fatin barak sira seluk sei iha.
“Depois ida-ne’e ami fila-fali ba, orienta profesór sira iha Timor laran tomak atu bele hato’o dadus ne’e mai hodi ami halo fali karta protesta petisaun foun hodi hatama,” nia dehan.
Deputadu membru komisaun G, Gabriel dos Santos, hateten komisaun simu lamentasaun refere no PN hanesan reprezentante povu rona tiha preokupasaun hirak ne’e sei hato’o iha plenária PN hodi husu ministériu tenke tau atensaun sériu.
Notísia Relevante: MEJD kontrata ona profesór voluntáriu 1.715 sai profesór kontratadu
Jornalista : Nelson de Sousa
Editór : Cancio Ximenes
