DILI, 14 fevereiru 2023 (TATOLI)–Ministru Edukasaun Juventude no Desportu, Armindo Maia, hateten MEJD sei fó oportunidade ba profesór 1.371 ne’ebé seidauk hetan prosesu kontratu atu hato’o sira-nia reklamasaun ho eskritu durante loron 15 nia laran.
Notísia Relevante: MEJD kontrata ona profesór voluntáriu 1.715 sai profesór kontratadu
Nia hatutan, rezultadu hosi estatutu profesór voluntáriu ne’ebé hakat ona ba kontratadu anunsia ona agora Ministériu sei loke oportunidade ba profesór voluntáriu sira-ne’ebé mak la tama iha lista kontratadu ne’e bele hato’o sira nia reklamasaun.
“Ita sei fó tempu loron 15 ba profesór 1.371 ne’ebé mak seidauk hetan oportunidade tama ba lista kontratadu ne’e atu hato’o sira-nia reklamasaun,” Armindo Maia ba jornalista sira iha konferénsia imprensa ne’ebé mak hala’o iha salaun VIP, Vila Verde, tersa ne’e.
Reklamasaun ne’ebé profesór voluntáriu 1.371 sei hato’o ne’e liuéosi nivel Munisipál atu nune’e labele difikulta prosesu sira no labele halo profesór sira hotu mai konsentra iha nasionál.
Governante ne’e hateten, bazea ba reklamasaun sira-ne’e mak sei fó oportunidade ba Ministériu Edukasaun atu kontinua halo verifikasaun
“Bainhira ita haree prosesu verifikasaun ne’e mak iha fatin ka loos, prontu ita sei hatuur fila-fali asuntu ne’e tuir nia fatin. Reklamasaun ne’ebé mak profesór voluntáriu sira sei halo ne’e ninia durasaun tempu sei to’o 28 fevereiru,” nia dehan.
Oportunidade reklamasaun ne’ebé MEJD fó ne’e liuhosi eskrita no reklamasaun ne’ebé Ministru husu ba profesór sira atu submete ne’e relasiona ho ninia estatutu no mós reklamasaun kona-ba protesta ruma hasoru ema seluk ne’ebé tuir reklamante katak ema-ne’e la hanorin tanbasá mak nia bele sai fali profesór kontratadu.
Atu buka solusaun ba reklamasaun profesór sira nian ne’e, nia dehan, presiza haree uluk sira-nia ezijénsia karik reklamasaun profesór sira-nian ne’e mak la loos hanesan Ministru labele naran simu de’it, tanba ne’e Ministériu rasik seidauk bele garante reklamasaun sira-ne’e bele simu hotu.
Jornalista : Tomé Amado
Editór : Cancio Ximenes
