DILI, 14 fevereiru 2023 (TATOLI)–Ministériu Edukasaun Juventude no Desportu (MEJD) liuhosi esforsu tomak hahú hosi 2021 mai to’o 2022 konsege rekruta ona profesór voluntáriu hamutuk na’in 1.715 sai professor kontratadu iha 2023 ne’e.
Notísia Relevante: KM avalia prosesu rekrutamentu profesór voluntáriu
Ministru Edukasaun Juventude no Desportu, Armindo Maia, hateten antes ne’e iha totál dokumentu profesór voluntária hamutuk 2.910 hosi munisípiu 13 la inklui Rejiaun Administrativu Espesiál Oé-Cuse Ambeno (RAEOA) mak Ministériu Edukasaun Juventude no Desportu (MEJD) halo ona selesaun.
Prosesu selesaun dokumentu ne’ebé MEJD halo ba manorin 2.910 ne’e konsege hetan konsiderasaun tama iha kritériu no sai profesór admitidu ne’e iha na’in 1.539, enkuantu profesór 1371 mak ninia dokumentu la admitidu.
“Dadus loloos profesór ne’ebé ninia dokumentu liu iha selesaun ne’e iha de’it 1.539 maibé depois ita halo tan selesaun ba profesór voluntáriu 176 ne’ebé hanorin programa eskola iha uma ne’e mak númeru profesór voluntáriu ne’ebé hakat ona ba kontratadu ne’e sa’e ba 1.715,” Ministru Edukasaun Armindo Maia ba jornalista sira iha konferénsia imprensa ne’ebé hala’o iha salaun VIP, Vila Verde, tersa ne’e.
Hosi totál dadus profesór voluntáriu 1,715 ne’ebé hakat ona ba kontratadu ne’e mai hosi eskola edukasaun Pre-Eskolár (EPE) iha 121, Ensinu Báziku (EB) iha 894, Ensinu Sekundáriu Jerál (ESG) iha 398, Ensinu Sekundáriu Tékniku Vokasionál (ESTV) iha 126 no edukasaun programa eskola iha uma hamutuk profesór 176.
Profesór 1.715 ninia estatutu prevee ona iha lei no sira ninia dadus ka naran sira públika ona iha jornál da Repúblika, ho nune’e ba oin sira-ninia estatutu tama ona ba profesór kontratadu inklui mós saláriu ne’ebé sira hetan iha ona mudansa.
Profesór kontratadu na’in 121 ne’ebé koloka iha edukasaun Pre-Eskolár ne’e kada fulan sira-nia saláriu aumenta ona ba $204, enkuantu ensinu báziku no ensinu sekundáriu jerál tékniku vokasionál sira nia hanesan hotu iha $272.
Notísia Relevante: MEJD propoin estatutu profesór voluntáriu 2.111 ba KM atu aprova
Jornalista : Tomé Amado
Editór : Cancio Ximenes
