DILI, 18 janeiru 2023 (TATOLI) – Ministru Edukasaun, Juventude no Desportu (MEJD), Armindo Maia, aprezenta, iha reuniaun Konsellu Ministru (KM), dilijénsia ne’ebé halo hela iha ámbitu prosesu rekrutamentu profesór voluntáriu sira.
Ministru Prezidénsia Konsellu Ministru, Fidelis Magalhães, hateten durante aprezentasaun, fahe ona opsaun sira ne’ebé sei avalia hela husi Ministériu Edukasaun ba prosesu rekrutamentu profesór voluntáriu sira.
“Konsellu Ministru rona aprezentasaun ida hosi Ministru Edukasaun, Juventude no Desportu, kona-ba situasaun profesór voluntáriu sira no kontradu, ne’ebé ministru aprezenta pontu situasaun no propoin solusaun sira. Konsellu Ministru sei foti medida sira hodi bele solusiona”, membru Ezekutivu ne’e hateten, hafoin reuniaun iha Palásiu Governu.
Governante ne’e realsa katak KM mós hato’o ba Ministru Edukasaun hodi buka solusaun ba problema sira ne’e “tanba ita mós lakohi atu ita-nian oan sira kontinua eskola bainhira laiha profesór sira kualifikadu mak hanorin”.
Nia afirma Governu mós lakohi husik de’it profesór sira ne’ebé mak presta ona servisu no kontribuiu durante ne’e ba setór edukasaun, nune’e tenki halo balansu ida no haree mekanizmu oinsá hadi’a sistema edukativu.
“Foin aprezentasaun de’it no pakote sira ne’e iha tempu oin mai Konsellu Ministru avalia para iha solusaun iha tempu badak. Maibé, ba dahuluk atu garante katak ita-nian oan sira hetan edukasaun ne’ebé di’ak tenki iha profesór sira”, nia salienta.
Ministru esplika tan atubele iha profesór ne’ebé kualifikadu, MEJD tenki iha sistema ne’ebé forte. “Ba sira ne’ebé mak kualifikadu tenki buka solusaun ba ida ne’e no ba hirak ne’ebé rekrutadu, más lakualifikadu tenki iha dalan ruma para solusiona mós. Importante liu maka edukasaun ba jerasaun aban bainrua”, nia konklui.
Notísia relevante: https://tatoli.tl/2022/10/03/mejd-prepara-kontratu-ba-profesor-voluntariu-2-111-submetidu-vaga/
Jornalista: Antónia Gusmão
Editora: Maria Auxiliadora
