iklan

EDUKASAUN, HEADLINE

MEJD prepara kontratu ba profesór voluntáriu 2.111 submetidu vaga

MEJD prepara kontratu ba profesór voluntáriu 2.111 submetidu vaga

Diretór Jerál Administrasaun no Finansa hosi MEJD, Antoninho Pires. Imajen Tatoli/Egas Cristóvão

DILI, 03 setembru 2022 (TATOLI)—Ministériu Edukasaun Juventude no Desportu (MEJD) daudaun ne’e prepara hela kontratu ba profesór voluntáriu 2.111 hosi 2.799 ne’ebé mak kompete iha vaga.

Diretór Jerál Administrasaun no Finansa hosi MEJD, Antoninho Pires, relata katak prosesu selesaun dokumentu profesór voluntáriu 2.799 nia remata iha semana kotuk no agora tama ona ba prosesu rekapitulasaun ba selesaun tuir giaun.

“Ami agora halo hela rekapitulasaun no ohin parese ami rekapitula ona sira ne’ebé selesionadu depois bainhira ramata ami sei husu aprovasaun hosi Ministru Edukasaun mak ami publika hodi halo kontratu,” Diretór Jerál hateten iha ninia knaar fatin, MEJD, Vila Verde, segunda ne’e.

Kontratu ne’e sei sura hosi fulan-setembru tanba profesór sira hanorin nanis ona, tanba ne’e saláriu mós sura hosi fulan ne’ebé sira asina kontratu.

“Profesór 688 ne’ebé sira-nia dokumentu la pasa iha prosesu selesaun sei iha oportunidade ba tinan 2023 tanba tinan oin karik sei iha tan vagatura iha profesór balun mate, balun sai no balun reforma. Ida-ne’e mak ami konsidera atu loke tan prosesu hodi bele prenxe nafatin vaga ne’ebé iha. Polítika ne’e atu hakotu sira ne’ebé hanaran profesór voluntáriu, maibé hakotu ne’e la’ós automátika no la’ós profesór voluntáriu sira ne’e atu hetan hotu kontratu, maibé depende ba vaga ne’ebé iha tanba presiza iha planu,” nia tenik.

Notísia relevante: MEJD hahú ona selesaun dokumentu profesór voluntáriu 2.799

Ministériu sei halo fali verifikasaun segundu iha dezembru tanba proposta profesór voluntáriu nian tama barak ona. Tanba ne’e ninia prosesu hotu sei taka hodi prepara ba tinan 2023 karik iha vaga ruma bele enkaixa profesór sira iha prosesu nia laran.

Enkuantu, prosesu verifikasaun no selesaun dokumentu profesór voluntáriu sira foti hosi profesór hanorin iha eskola privadu hosi tinan 2003 to’o 2013 no profesór voluntáriu iha eskola públiku iha tinan 2007 to’o 2017, enkuantu profesór voluntáriu hosi tinan 2018, ninia prosesu sei hahú fali iha tinan 2023.

“Ami sei fó exsesaun, katak sei haree filafali nesesidade karik eskola sira iha área remota presiza duni profesór no sira ne’ebé hanorin iha matéria espesiál hanesan matemátika no siénsia ne’ebé laiha ema, entaun ami bele foti, tanba ne’e maka ita dehan depende ba nesesidade. Ita sei loke vaga iha tinan 2023,” nia tenik.

Aleinde ne’e, prosesu verifikasaun dadus profesór voluntáriu ne’ebé ekipa sira halo iha tinan 2021  konsege identifika iha profesór voluntáriu hamutuk 5.588 maibé lista rekolladu iha 2.799 inklui mós lista adisionál sai 2.789.

Jornalista   : Tomé Amado

Editora        : Julia Chatarina

iklan
iklan

5 Comments

  1. Favor Media TATOLI Bele Intervista lai MEJD Kona ba Promesa atu Rekruta Voluntario Sira nia nee. Tmba Excelencia MEJD Deside Atu recruta iha Fulan Setembru maibe Laiha realidade.
    No MEJD Dada too fali Fulan Outubro Ne’e… E fulan kuaze ate tama Ona ba fulan klaran. Obrigado.

Leave a Reply

iklan
error: Content is protected !!