DILI, 12 janeiru 2023 (TATOLI)–Ministru Edukasaun Juventude no Desportu (MEJD) Armindo Maia, hateten estatutu profesór voluntáriu 2.111 ne’ebe liu ona hosi prosesu verifikasaun dadus sei submete ba Konsellu Ministru atu hetan aprovasaun.
Notísia Relevante: MEJD prepara kontratu ba profesór voluntáriu 2.111 submetidu vaga
Governante ne’e hatutan, kona ba destinu prosesu profesór voluntáriu nian sei lori uluk ba konsellu ministru, atu nune’e bele hetan aprovasaun no antes fulan janeiru nia rohan ne’e bele anúnsiu ona rezultadu.
“Ita espera katak antes fulan ida-ne’e ramata bele anúnsia ona rezultadu kona ba destinu profesór voluntáriu sira-nian. Tanba ne’e, dadus profesór voluntáriu ne’ebé MEJD prepara ona sei submete ba KM ne’e hamutuk profesór 2.111,” Governante ne’e hateten ba Agência Tatoli iha Palásiu do Governu.
Diretór Servisu Edukasaun Munisípiu Dili (SEMD), Carlito Soares, hateten molok fulan ida-ne’e ramata ne’e estatutu profesór voluntáriu iha munisípiu Dili hamutuk 250 bele termina ona, no sira bele asina ona kontratu.
Maibé, nia husu nafatin ba profesór sira seluk ne’ebé seidauk hetan oportunidade atu lalika laran taridu tanba sei iha oportunidade.
“Ha’u nafatin enkoraja profesór voluntáriu sira iha Dili ne’ebé seidauk hetan oportunidade atu asina kontratu atu lalika laran taridu tanba sei iha oportunidade tuir mai,” nia dehan.
Loloos profesór voluntáriu iha Dili ne’e hamutuk 444 no bainhira sira mak hetan hotu kontratu bele dehan profesór voluntáriu iha Dili bele mamuk, maibé tanba depende ba númeru estudante entaun deside uluk ema na’in-250 depois mak seluk sei kontinua tan.
Profesór voluntáriu hamutuk 2.111 ne’ebé mak liu ona hosi prosesu verifikasaun no selesaun dokumentu ne’e, foti hosi profesór voluntáriu sira-ne’ebé mak hanorin iha eskola privadu sira hahú hosi tinan 2003 to’o 2013, no profesór voluntáriu sira-ne’ebé hanoin iha eskola públiku hahú hosi tinan 2007 to’o 2017.
Enkuantu, profesór voluntáriu sira hosi 2018 ninian ne’e, sira-nia prosesu sei hahú fali iha tinan 2023 ne’e.
Dadus verifikasaun ne’ebé mak ekipa MEJD halo iha 2021 ne’e konsege identifika ona profesór voluntáriu hamutuk 5.588, maibé lista ne’ebé rekolla ne’e iha 2.799 inklui mós lista adisionál ne’ebé sai hamutuk 2.789.
Notísia Relevante: Profesór voluntáriu 2.799 sei kompete iha vaga 2.111
Jornalista : Tomé Amado
Editór : Cancio Ximenes
