Profesór voluntáriu 2.799 sei kompete iha vaga 2.111

DILI, 23 agostu 2022 (TATOLI)–Profesór voluntáriu rekollandu hamutuk 2.799 sei kompete iha prosesu selesaun dokumentu ba vaga 2.111, ne’ebé Ministériu Edukasaun Juventude no Desportu (MEJD) rasik prepara ona.

Diretór Nasionál Rekursu Umanu Ministériu Edukasaun Juventude no Desportu (MEJD), Justino Varela, hateten, prosesu verifikasaun dadus profesór voluntáriu ne’ebé ekipa halo iha tinan 2021 ne’e konsege identifika iha profesór voluntáriu 5.588 maibé lista rekollandu iha na’in-2.799 inklui lista adisionál 2.789.

“Ita sei la realiza teste eskrita hanesan baibain halo iha konkursu ruma, maibé ita presiza halo de’it selesaun dokumentu ba profesór voluntáriu 2.799. Sé ninia dokumentu maka prienxe ona rekezitu mak nia mak sei hetan kontratu bazeia ba vaga 2.111 ne’ebé prepara ona,” Diretór informa iha edifísiu Edukasaun, Vila-Verde, tersa ne’e.

Notísia relevante: KFP husu MEJD labele aplika funsionáriu Voluntáriu

Bazeia ba dadus profesór rekollandu hamutuk 2.799 ne’ebé públika ona maka MEJD husu profesór ida-idak atu submete dokumentu iha kada munisípiu atu ekipa sira bele halo selesaun tuir rekizitu no sei hetan direitu ba kontratasaun.

MEJD prevee vaga 2.111 hosi dadus profwsór sira ne’ebé mate ona inklui inválidu no rezigna-an hamutuk 1.300 resin, hafoin hatama tan ho vagatura anteriór hamutuk 975.

“Ninia kritéru rasik maka hanesan ba profesór voluntáriu iha eskola privadu sira hahú hosi tinan 2003 to’o 2013 no ba eskola públiku sira foti hosi tinan 2007 to’o 2017 hosi kritériu rua ne’e ministériu halo totál 894, kompostu hosi 154 hosi eskola privadu no eskola públiku iha 830, ne’ebé sira ne’e maka hetan ona prioridade atu rekruta agora no tuir planu setembru sei asina kontratu,” nia akresenta.

Iha sorin seluk, profesór voluntáriu lubuk ida maka halo protesta ba MEJD tanba la kontente ho publikasaun naran ne’ebé fó sai ona.

Profesora voluntáriu hosi Eskola Maria Auxiliadora, Merita Ximenes, relata katak sira marka prezensa iha edifísiu MEJD atu hasoru malu ho Diretór Nasionál Rekursu Umanu tanba la kontente ho desizaun ne’ebé fó sai ona, liu-liu lista ne’ebé públika.

“Tanba saida profesór balun maka foin hanorin iha tinan 2021, sira-nia naran públika fali maibé profesór balun hanorin iha tinan 2014 naran la públika. Hafoin iha mós profesór balun rezigna-an ona hosi ninia kargu hodi ba serbisu fali iha rai-li’ur maibé sira-nia naran kontinua públika. Ami hakarak husu ministériu atu halo klarifikasaun tanba ami serbisu tinan barak ona maibé ami-nia naran la públika ne’e tanba saida, tenke esplika mai ami,” nia tenik.

Nia konfesa, sira tenta hakarak hasoru Diretór Nasionál Rekursu Umanu maibé parte diresaun husu ba hasoru Diretór Servisu Edukasaun Dili, nune’e bainhira sira delega ekipa ida ba, Servisu Edukasaun lakohi atende tanba presiza karta despaixu.

“Ami husu ministériu atu rezolve problema ne’e, karik semana ida-ne’e laiha solusaun maka sei lori kazu ne’e ba Parlamentu Nasionál,” nia salienta.

Jornalista   : Tomé Amado  

Editora        : Julia Chatarina